സ്കൂള്‍കുട്ടി

അക്ഷാംശവും രേഖാംശവും സമയമേഖലകളും ( സാമൂഹ്യശാസ്ത്രം)

2010-10-19T23:59:00.000+05:30

അക്ഷാംശവും രേഖാംശവും (ആറാം തരം സാമൂഹ്യശാസ്ത്രം)

2010-10-19T23:47:00.000+05:30

സൂര്യഗ്രഹണം ദേ ‘ബടെ ക്കാണാം...

2009-07-18T13:55:00.005+05:30

ഈ മാസം 22ന് സൂര്യഗ്രഹണമാണെന്ന് അറിയാമല്ലോ.നിങ്ങളുടെ പ്രദേശത്ത് എപ്പോഴാണ് സൂര്യഗ്രഹണം അനുഭവപ്പെടുക എന്ന് അറിയാമോ?അതിന് ഇവിടെ ഒരു സൂത്രമുണ്ട്.ഇവിടെ പോയി നിങ്ങള്‍ സൂര്യഗ്രഹണം കാണാന്‍ ഉദ്ദേശിക്കുന്ന സ്ഥലം തെരഞ്ഞെടുത്ത് കൊടുക്കണം.ഞാന്‍ പട്ടാമ്പി തെരഞ്ഞെടുത്തു കൊടുത്തിരിക്കുന്നു.അതിനു ശേഷം
'click here to run a simulation of the eclipse.' എന്നൊരു ഭാഗം കണ്ടോ? അതില്‍ here എന്ന ഭാഗത്ത് ക്ലിക്കണം.ഇപ്പോള്‍ തുറക്കുന്ന ജാലകത്തില്‍ മുകളില്‍ സ്കെയിലു പോലെ ഒരു സംഗതി കാണാം .അതിന്റെ ഒരറ്റത്ത് രണ്ടു ബട്ടനും കാണാം.അതൊന്ന് പിടിച്ചു വലിച്ചു നോക്കൂ.ജൂലൈ 22 ന് എത്ര മണിക്കാണ് നിങ്ങള്‍ താമസിക്കുന്ന ഭാഗത്ത് സൂര്യഗ്രഹണം ഉണ്ടാവുന്നതെന്നും ഗ്രഹണം എങ്ങനെയായിരിക്കുമെന്നും കാണാം.

റീഡറില്‍ ഇതു ഷെയര്‍ ചെയ്ത് എന്റെ ശ്രദ്ധയില്‍ പെടുത്തിയ സിബുവിന് നന്ദി

ഗലീലിയോ ലിറ്റില്‍ സയന്റിസ്റ്റ് (അവസാന ഭാഗം)

2009-07-18T12:27:00.000+05:30

Galileo little scientist Last Part

ഗലീലിയോ ലിറ്റില്‍ സയന്റിസ്റ്റ് 5

2009-07-18T12:26:00.000+05:30

Galileo little scientist Handbook Part 05

ഗലീലിയോ ലിറ്റില്‍ സയന്റിസ്റ്റ് 4

2009-07-18T12:15:00.001+05:30

Galileo little scientist Handbook 04

ഗലീലിയോ ലിറ്റില്‍ സയന്റിസ്റ്റ് 3

2009-07-18T12:11:00.000+05:30

Galileo little scientist Handbook 03

ഗലീലിയോ ലിറ്റില്‍ സയന്റിസ്റ്റ് 2

2009-07-18T12:10:00.000+05:30

Galileo little scientist Handbook 02

2009-07-18T12:02:00.000+05:30

Galileo little scientist Handbook 01

ഗലീലിയോ ലിറ്റില്‍ സയന്റിസ്റ്റ് (കൈപ്പുസ്തകം)

2009-07-18T11:58:00.002+05:30

Galileo little scientist

അദ്ധ്യാത്മ രാമായണം കിളിപ്പാട്ട്

2009-06-24T19:49:00.001+05:30

Adhyatma Ramayanam (Malayalam) by Ezhuthachan

പടയാളികള്‍ -വൈലോപ്പിള്ളി

2009-06-24T19:29:00.003+05:30

(ഏഴാം ക്ലാസിലെ മലയാളത്തിലെ മനുഷ്യന്റെ കൈകള്‍ എന്ന യൂണിറ്റിലെ തിരുനെല്ലൂര്‍ കരുണാകരന്റെ കവിതയുമായി താരതമ്യം ചെയ്യുന്നതിന് കുട്ടികള്‍ക്ക് നല്‍കാന്‍ )
പാതിരാക്കോഴി വിളിപ്പതും കേള്‍ക്കാതെ
പാടത്തു പുഞ്ചയ്ക്കു തേവുന്നു രണ്ടുപേര്‍;
ഒന്നൊരു വേട്ടുവന്‍, മറ്റേതവന്‍ വേട്ട
പെ,ണ്ണിവര്‍ പാരിന്റെ പാദം പണിയുവോര്‍
ഭൂതം കണക്കിനേ മൂടല്‍മ,ഞ്ഞഭ്രവും
ഭൂമിയും മുട്ടിപ്പരന്നുനിന്നീടവേ
തങ്ങളില്‍ത്തന്നേയടങ്ങി നിലാവത്തു
തെങ്ങുകള്‍ നിന്ന നിലയ്ക്കുറങ്ങീടവേ
ഈയര്‍ദ്ധനഗ്നരാം ദമ്പതിമാര്‍കളോ
പാടത്തു പുഞ്ചയ്ക്കു പാരണ നല്‍കയാം.
തേക്കൊട്ട മുങ്ങിയും പൊങ്ങിയും തേങ്ങുമ്പൊ-
ഴീക്കൂട്ടര്‍ പാടുമത്യുച്ചമാം പാട്ടുകള്‍,
ഗദ്ഗദരുദ്ധമാം രോദനം പോലവേ
ദു:ഖിതരായി ശ്രവിക്കുന്നു ദിക്കുകള്‍!
നല്‍ത്തുലാവര്‍ഷവും കാത്തിരുന്നങ്ങനെ
പാര്‍ത്തലം വൃശ്ചികം പാടേ കടന്നുപോയ്.
നാലഞ്ചുതുള്ളിയേ നാകമുതിര്‍ത്തുള്ളു
നാനാചരാചരദാഹം കെടുത്തുവാന്‍.
വര്‍ദ്ധിച്ച താപേന വന്മരുഭൂവിലെ-
യധ്വഗര്‍പോലെത്തുമോരോ ദിനങ്ങളും
പാടത്തെവെള്ളം കുടിച്ചുവറ്റിക്കയാല്‍
വാടിത്തുടങ്ങീതു വാരിളം നെല്ലുകള്‍.
തൈത്തലയെല്ലാം വിളര്‍ത്തൂ, മുളകിന്റെ
കൈത്തിരി തീരെക്കൊളുത്താതെ വീണുപോയ്!
കാര്‍മണ്ഡലത്തെ പ്രതീക്ഷിക്കുമൂഴിയെ-
പ്പാഴ്മഞ്ഞുതിര്‍ത്തു ഹസിക്കയാം വിണ്ടലം.!
ഹാ കഷ്ടമെങ്ങനെ മര്‍ത്ത്യന്‍ സഹിക്കുമീ
മൂകപ്രകൃതിതന്നന്ധമാം ക്രൂരത?
ഇപ്പെരും ക്രൂരതയോടു പോരാടുവോ-
രിപ്പൊഴും പുഞ്ചയ്ക്കു തേവുമീ വേട്ടുവര്‍;
പഞ്ചഭൂതങ്ങളോടങ്കമാടീടുമീ-
പ്പഞ്ചമരത്രേ പെരും പടയാളികള്‍.
മാലോകര്‍ തുഷ്ടിയാം തൊട്ടിലില്‍, നിദ്രതന്‍-
താലോലമേറ്റു മയങ്ങിക്കിടക്കവേ,
തന്‍ ജീവരക്തമൊഴുക്കുന്നു പാടത്തു
തണ്ണീരിലൂടെയിദ്ധീരനാം പൂരുഷന്‍.
കാന്തന്റെ തേരില്‍ കടിഞ്ഞാണ്‍ പിടിക്കുന്നു
താന്‍ തന്നെ തേവിക്കൊടുക്കുമിപ്പെണ്‍കൊടി
പാട്ടുകള്‍ പാടിക്കെടുത്തുന്നു തന്വംഗി
കൂട്ടുകാരന്റെ തണുപ്പും തളര്‍ച്ചയും.
പാടുകയാണിവള്‍ പാലാട്ടുകോമന്റെ
നീടുറ്റ വാളിന്‍ നിണപ്പുഴക്കേളികള്‍.
ആരാണു വീറോടു പോരാടുമീ രണ്ടു
പോരാളിമാര്‍കളെപ്പാടിപ്പുകഴ്ത്തുവാന്‍?

(ഇത് മെയിലായി അയച്ചു തന്ന പ്രമോദിനും ഹസീനയ്ക്കും നന്ദി)

ഭൂമിയുടെ അച്ചുതണ്ടും ഋതുഭേദങ്ങളും

2008-11-07T01:22:00.000+05:30

ഗുണിക്കാന്‍ ഒരു സൂത്രം

2008-11-05T20:07:00.000+05:30

Via: Video Blog

ഈ വീഡിയോയില്‍ കാണുന്ന മട്ടില്‍ ഈര്‍ക്കിലികള്‍ ഉപയോഗിച്ചും ഗുണിച്ചിരുന്നതായി എന്റെ ചില സഹ പ്രവര്‍ത്തകര്‍ പറയുകയുണ്ടായി.രസമെന്താണെന്നു വെച്ചാല്‍ ചെറിയ സംഖ്യകളുടെ മാത്രമല്ല വലിയ സംഖ്യകളുടെ ഗുണനവും ഭിന്നസംഖ്യകളുടെ സങ്കലനവും ഇത് ഉപയോഗിച്ച് വിശദീകരിച്ചിരിക്കുന്നത് ഈ പേജിലെ വീഡിയോകളില്‍ കാണാം.

ഇന്‍റ്റെറാക്റ്റീവ് പീരിയോഡിക് ടേബിള്‍

2008-10-27T08:41:00.001+05:30

വെബ്ബില്‍ മികച്ച പീരിയോഡിക് ടേബിളുകള്‍ കാണാന്‍ കഴിഞ്ഞു.അധ്യാപകര്‍ക്കും വിദ്യാര്‍ഥികള്‍ക്കും പ്രയോജനപ്പെടുത്താവുന്നതാണ്.
*ഇന്‍റ്റെറാക്റ്റീവ് പീരിയോഡിക് ടേബിള്‍
**മൂലകങ്ങള്‍ കാണാവുന്ന പീരിയോഡിക് ടേബിള്‍
***മൂലകങ്ങളുടെ ഉപയോഗം കാണിക്കുന്ന പട്ടിക
****മറ്റൊന്ന്
*****പീരിയോഡിക് വീഡിയോസ് മൂലകങ്ങളെ സംബന്ധിച്ച ചെറു വീഡിയോചിത്രങ്ങള്‍

2008-10-17T11:47:00.000+05:30

See more funny videos and funny pictures at CollegeHumor.

നിങ്ങള്‍ക്കും ഒരു ചുഴലിക്കൊടുങ്കാറ്റ് ഉണ്ടാക്കാം...

2007-07-01T01:00:00.000+05:30

കുട്ടികളേ,
കൊടുങ്കാറ്റുകളെ കുറിച്ച് പഠിച്ചിട്ടുണ്ടോ?ഹ്യൂറികെയ്നുകള്‍ ടൊര്‍ണാഡോകള്‍...
ഇവയെ കുറിച്ചൊക്കെ കേട്ടു കാണും.ഒരു ഹ്യൂറികെയ്ന്‍ എങ്ങനെയാണ് ഉണ്ടാവുക...അത് ഉണ്ടാക്കി നോക്കിയാലോ..?രസമായിരിക്കും അല്ലേ?എന്നാല്‍ അതിന് ഒരു അവസരമുണ്ട്.നാഷനല്‍ ജ്യോഗ്രഫികിന്റെ സൈറ്റില്‍ അതിനുള്ള സൌകര്യമുണ്ട്.ഇതാ ഇവിടെ ഒന്നു ക്ലിക്കിയാല്‍ ആ സൈറ്റില്‍ എത്തും.പിന്നെ അവിടെ പറയുന്നതു പോലെ ചെയ്താല്‍ മതി.കാര്യങ്ങളൊക്കെ ഇംഗ്ലീഷിലാണ്.മുതിര്‍ന്നവരുടെ സഹായം ഉപയോഗപ്പെടുത്തിക്കോളൂ.അവിടെ ചെന്നാല്‍ ഭൂമികുലുക്കം,അഗ്നിപര്‍വര്‍ത സ്ഫോടനം...തുടങ്ങിയവയും ഉണ്ടാക്കി നോക്കാന്‍ പറ്റും.മാത്രമല്ല ഇവയെക്കുറിച്ചൊക്കെ ചെറിയ വിവരണങ്ങളും ലഭ്യമാണ്.

ഇലമുളച്ചികളേ വെള്ളത്തണ്ടുകളേ...

2007-06-03T18:49:00.000+05:30

കുട്ടികളേ, നാളെ സ്കൂള്‍ തുറക്കുകയാണ്.കുട്ടികള്‍ക്കല്ല,അവരുടെ രക്ഷിതാക്കള്‍ക്ക് വായിക്കാന്‍ ഒരു കവിതയും കഥയും ഇവിടെ വെക്കുന്നു.

കേട്ടെഴുത്ത്
ഉമ്പാച്ചി

കയറ്റത്തെയും
ഇറക്കത്തെയും
കുറിച്ചുള്ള
തത്വ വിചാരത്തില്‍
മുഴുകി
സ്കൂള്‍ മുറ്റത്തെ
നാട്ടുമാവും
മറ്റേകൊള്ളിലെ
പുളിമരവും
മലമുകളില്‍ നിന്നും
ഇംഗ്ലീഷ് മീഡിയം
കുട്ടികളെ വാടക വണ്ടികള്‍
ഇറക്കികൊണ്ടു പോവുമ്പോള്‍
ഒരാധി
സ്കൂളിലേക്ക്
കയറിവരും
അപ്പോഴൊക്കെ
വിചാരിച്ചിട്ടുണ്ട്
കുട്ടികളില്ലാത്ത
തക്കം നോക്കി
മേല്‍ക്കൂരയെ
അങ്ങനെ തന്നെ
ബെഞ്ചിലിരുത്തി
നാട്ടുകാരെ ഒരു പാഠം
പഠിപ്പിക്കണം
അതിനു
സമ്മതിക്കുന്നില്ല
കുട്ടികളെ
കട്ടുകേട്ട ചുമരുകള്‍ .

വിഭജനം
മെഹബൂബ് കൂടല്ലൂര്‍

കലാപത്തിന്റെ പിറ്റേന്ന്
മരനവീട്ടിലെ മൂകത്യായിരുന്നു നാട്ടില്‍.സിമന്റ് ചെയ്ത പാടവരമ്പിലൂടെ അന്നും ഞങ്ങള്‍ കുട്ടികള്‍ മദ്രസയിലേക്ക് നടന്നു.ചോര്‍ച്ചയുള്ള ഓടു കെട്ടിടം.കിലോമീറ്ററുകള്‍ക്കപ്പുറത്ത് കേള്‍ക്കാവുന്ന ഉസ്താദിന്റെ ശബ്ദം.
ഇന്നലെ സംഭവിച്ചതൊക്കെ,നിഷിദ്ധമായ ഏതോ സിനിമയിലെ രംഗങ്ങളാണെന്നു തോന്നി.ഒറ്റച്ചെരിപ്പിട്ട് കവുങ്ങിന്‍ തോപ്പിലൂടെ പായുന്ന ആള്‍കൂട്ടം.എന്തിനായിരുന്നുവെന്ന് മനസ്സിലായില്ല അലര്‍ച്ച.നിലവിളി.രക്തരേഖകള്‍ വഴിയടയാളം.
ദുര്‍ബലമായ വാതില്‍ തള്‍ലിത്തുറന്ന് മദ്രസ്സ്യിലേക്ക് കയറി.ഈര്‍പ്പത്തിന്റെ ഗന്ധംഇന്നലെപ്പെയ്ത മഴയുടെ സാക്ഷ്യങ്ങള്‍ .ആരും വന്നിട്ടുണ്ടായിരുന്നില്ല.മുസ്ഹഫിന്റെ താളുകള്‍ മറിച്ചൂസ്താദിന്റെ ഈണത്തിലുള്ള വായന.കടലിരമ്പം പോലെ ഏറ്റു ചൊല്ലലിന്റെ താളം.
പെട്ടെന്ന് വാതില്‍ തുറന്ന് താടിയും തലപ്പാവുമുള്ള കുറേപ്പേര്‍ കടന്നുവന്നു.ഞങ്ങള്‍ കുട്ടികള്‍ക്ക് തീര്‍ത്തും അപരിചിതരായിരുന്നവര്‍ .പേടിയോടെ എഴുന്നേട്ടു നിന്നു.അറബിയില്‍ അവര്‍ ഇരിക്കാന്‍ പറഞ്ഞു.ഞങ്ങളുടെ ഉസ്താദിനെ മാത്രം അവര്‍ക്കിടയില്‍ കണ്ടില്ല.
ഒരാള്‍ ചറുപിറുന്നനെ സംസാരിച്ചു തുടങ്ങി;‘പടച്ചവന്റെ തെരഞ്ഞെടുക്കപ്പെട്ട വിഭാഗമാണ് നാം.ഏത് പ്രശ്നങ്ങളില്‍ നിന്നും നമ്മെ രക്ഷിക്കാന്‍ അള്ളാഹുവുണ്ട്.ഇന്ന് നടക്കുന്ന എല്ല പ്രശ്നങ്ങള്‍ക്കും കാരണം
നമ്മളില്‍ വിശ്വാസം കുറഞ്ഞു പോയതാണ്.പള്ളികളാവണം നമ്മുടെ വീടുകള്‍ .പ്രാര്‍ഥനാ നിരതമായിരിക്കണം ഓരോ ജീവ ശ്വാസവും.ഇനി നിങ്ങളാരും കാഫിറുകളുടെ കൂടെ സ്കൂളില്‍ പോവരുത്.ഇവിടെ മുസ്ലീം കുട്ടികള്‍ക്ക് മാത്രമായി ഒരു ഇംഹ്ലീഷ് മീഡിയം സ്കൂള്‍ തുറക്കുന്നുണ്ട്.ഇഹത്തിലും പരത്തിലും ശാശ്വതമായ വിജയമാണ് നമ്മുടെ ലക്ഷ്യം.
ഞങ്ങളാരും അന്ന് സ്കൂളില്‍ പോയില്ല.എനിക്ക് സങ്കടം വന്നു.ടി.വി യില്‍ കണ്ട വിശേഷങ്ങളുമായി രശ്മിക്കുട്ടി എന്നെ കാത്തിരിക്കും.
രാത്രി ഉറക്കം വരാതെ ഓരോന്നോര്‍ത്തു കിടന്നു.രശ്മിക്കുട്ടി എങ്ങനെയാണ് കാഫിറായത്?മരിച്ചു ചെന്നാല്‍ അവളെ നരകത്തിലിട്ടു വേവിക്കുമോ?ശരീരം ഒന്നാകെ കിടുത്തു പോയി.പടച്ചവന് എല്ലാവരേയും മുസ്ലീമായി ജനിപ്പിക്കാമായിരുന്നില്ലേ...?
പാതി മയക്കത്തില്‍ പ്രവാചകന്‍ സ്വപ്നത്തിലേക്ക് വന്നു.കരഞ്ഞു കലങ്ങിയ എന്റെ കണ്ണു തുടച്ച് വാത്സല്യത്തോടെ അദ്ദേഹം പറഞ്ഞു:“അവര്‍ പറയുന്നതൊന്നും മോന്‍ കേള്‍ക്കേണ്ട.മോന്‍ മോന്റെ സ്കൂളില്‍ തന്നെ പൊയ്ക്കോ.”
പിറ്റേന്ന് മദ്രസയില്‍ പോകാതെ വഴിവക്കിലെ പറമ്പുകളിലൊന്നിലുള്ള മോട്ടോറ്പ്പുരയില്‍ കയറി ഒളിച്ചു.സ്കൂളില്‍ പോകുന്ന സമയം വരെ കാത്തിരുന്നു.വിറയ്ക്കുന്ന കാലുകളോടേയാണ് സ്കൂളിലേക്കുള്ള നടവഴി ഓടിക്കയറിയത്.ചെന്നു നോക്കുമ്പോള്‍ അടഞ്ഞു കിടക്കുന്നു പടി വാതില്‍.നിരാശ ഉച്ചിയോളമെത്തി.കണ്ണ് നിറഞ്ഞു.
നനവ പാട കെട്ടിയ കാഴ്ചയില്‍ പെട്ടെന്ന് പുതീയ ഒരു കെട്ടിടം കണ്ടു.സ്കൂള്‍ പോലെ തന്നെ...ആവേശത്തോടെ അടുത്തു പോയി.ജനലുകളുള്ള ക്ലാസ് മുറിയില്‍ കുനിഞ്ഞിരുന്ന് എന്തോ എഴുതിയെടുക്കുന്ന രശ്മിക്കുട്ടി..സങ്കടങ്ങളൊക്കെ പമ്പ കടന്നു.അത്യാഹ്ലാദത്തോടെ സ്കൂളിന്റെ പടികള്‍ കയറാന്‍ തുടങ്ങുമ്പോള്‍ മഞ്ഞയില്‍ കറുപ്പ് കൊണ്ട് എഴുതിയ ഒരു ബോര്‍ഡ് കണ്ടു.‘ഹിന്ദു ഇംഗ്ലീഷ് മീഡിയം സകൂള്‍’

****************************************************************************

കഥയും കവിതയും വായിച്ചില്ലേ...?നമ്മുടെ പൊതു വിദ്യാലയങ്ങള്‍ ഭീഷണമായ ഒരന്തരീക്ഷത്തിലാണ്.കാശുള്ളവന് വേറേ സ്കൂള്‍,ഹിന്ദുവിന് ഹിന്ദു സ്കൂള്‍,മുസ്ലീമിന് മുസ്ലീം സ്കൂള്‍...മതേതരബെഞ്ചുകള്‍ തിരിച്ചു പിടിക്കേണ്ട കാലമായിരിക്കുന്നു...

വാല്‍ക്കഷ്ണം:എന്റെ അച്ചാച്ചന്‍ ഇംഗ്ലീഷ് അറിയാത്തതുകൊണ്ട് മരിച്ചു,അമ്മമ്മയും മരിച്ചു.ഇനി ഞാനും മരിക്കും...ഇംഗ്ലീഷറിയാതെ ജീവിക്കാന്‍ പറ്റില്ലാന്നാ പറയ്ണത്...

ഇലമുളച്ചികളേ വെള്ളത്തണ്ടുകളേ എല്ലാം മായ്ക്കൂ.ഈ മലയാളം മുഴുവന്‍....ഒന്നും ബാക്കി വെക്കാതെ...

ഒറ്റ വൈക്കോല്‍ വിപ്ലവം - 2

2007-06-01T04:15:00.000+05:30

ഒറ്റ വൈക്കോല്‍ വിപ്ലവം ഒന്നിന്റെ തുടര്‍ച്ച.
ഒന്നാം ഭാഗം ഇവിടെ
_______________________________

"ഈ കുടിലുകളിലെത്തുന്ന യുവാക്കളില്‍ ആശയറ്റവരും ആത്മാവിലും ശരീരത്തിലും ഒരുപോലെ ദരിദ്രരും ഉണ്ട്.അവര്‍ക്കൊരു ജോടി ചെരുപ്പു കൊടുക്കാന്‍ പോലും കഴിവില്ലാത്തൊരു കിഴവന്‍ കൃഷിക്കാരന്‍ മാത്രമാണു ഞാന്‍.എന്നാല്‍ എനിയ്ക്കു നല്‍കാന്‍ ഒരു സാ‍ധനമുണ്ട്.

ഒരിഴ വൈക്കോല്‍!

കുടിലിനു മുന്നില്‍ നിന്ന് ഒരിഴ വൈക്കോലെടുത്തു ഞാന്‍ പറഞ്ഞു..
“ഈ ഒരിഴ വൈക്കോലില്‍ നിന്നു തുടങ്ങാം വിപ്ലവം.”

“മാനവരാശിയുടെ വിനാശം ആസന്നമായിരിയ്ക്കേ ആശയോടെ പിടിച്ചു തൂങ്ങാന്‍ നിങ്ങള്‍ക്കൊരിഴ വൈക്കൊലെങ്കിലുമുണ്ടെന്നോ?” ഒരു ചെറുപ്പക്കാരന്‍ അല്‍പ്പം കടുപ്പത്തില്‍ ചോദിച്ചു.

ഈ വൈക്കോലിഴ ചെറുതും ലഘുവുമാണ്.എന്നാല്‍ അതിന്റെ കനം മിക്കവര്‍ക്കുമറിയില്ല.ഈ വൈക്കോലിന്റെ ശരിമൂല്യമെന്തെന്ന് ആളുകള്‍ക്കറിയാമെങ്കില്‍ ഈ രാജ്യവും, ലോകവും മാറ്റാന്‍ തക്ക കരുത്തുറ്റൊരു വിപ്ലവം സാധ്യമായേനേ."

(മസനോബു ഫൂക്കുവോക്ക . ഒറ്റ വൈക്കോല്‍ വിപ്ലവം)

അമ്പിയണ്ണാ..എന്താ ഈ വൈക്കോലും വിപ്ലവവുമായുള്ള ബന്ധമെന്ന് ഇനിയും എനിയ്ക്ക് മനസ്സിലായിട്ടില്ല..

ഒന്നുമില്ല..വെറും ലളിതം "ഒരിഴ വൈക്കോല്‍ പോലും കളയരുത്..കാര്യമില്ലാതെ ഒരു ചുവട് പോലും വയ്ക്കരുത്.."ഇതാണ് ഫുക്കുവോക്കയുടെ മന്ത്രം..
നമുക്ക് കഥ പറയാം ..ബാക്കി വഴിയേ പറയാം:)

അപ്പൊ നമ്മളെവിടെയാ നിര്‍ത്തിയത്? അനുഭവം വരെ..
അതുതന്നെ..അതിനുശേഷം അദ്ദേഹം എന്തു ചെയ്തു?

അദ്ദേഹം അതിന്റെ പിറ്റേന്ന് ജോലി രാജിവച്ചു..

ജോലി രാജിവച്ചോ !! ? എന്താ പുള്ളിയ്ക്ക് വട്ടായോ..:)

അങ്ങനെതന്നാ എല്ലാരും വിചാ‍രിച്ചിരുന്നത്..യാ‍ത്രാ വിരുന്നില്‍ ഫുക്കുവോക്ക പറഞ്ഞതുകൂടെ കേട്ടപ്പോഴേയ്ക്കും സുഹൃത്തുക്കളൊക്കെ ഉറപ്പിച്ചു..അവര്‍ മനസ്സില്‍ പറഞ്ഞു കാണും”പാവം നല്ലൊരു പയ്യനായിരുന്നു“ :)

എന്താ യാത്രയയപ്പ് വിരുന്നില്‍ ഫുക്കുവോക്ക പറഞ്ഞത്?

അത് നല്ല രസമാണ് പുസ്തകത്തില്‍ നിന്നു തന്നെ എടുത്ത് പറയാം.

“ഈ ഭാഗത്ത് പാതാറ്, അപ്പുറത്ത് നാലാം കടല്‍പ്പാലം.ഈ ഭാഗത്ത് ജീവിതം എന്നാണ് നിങ്ങളുടെ കരുതലെങ്കില്‍ ആ ഭാഗത്താണ് മരണം. മരണ ഭയത്തില്‍ നിന്നു മുക്തനാകണമെങ്കില്‍ ഈ ഭാഗത്താണ് ജീവിതമെന്ന ധാരണയുപേക്ഷിയ്ക്കണം..ജീവിതവും മരണവും രണ്ടും രണ്ടു സംഗതിയല്ല..“
ഇതുകൂടി കേട്ടപ്പോള്‍ എല്ലാവര്‍ക്കും എന്നെക്കുറിച്ച് വേവലാതി കൂടി.ഇയാ‍ള്‍ എന്താണീ പറയുന്നത്?മനസ്സിന്റെ സമനില തെറ്റിക്കാണും ..
അവരങ്ങനെ കരുതിയിട്ടുണ്ടാകും.അനുതാപപൂര്‍ണ്ണമായ മുഖങ്ങളോടെ അവരെന്നെ യാത്രയാക്കി.നല്ല ചുറുചുറുക്കോടേ പുറത്തിറങ്ങിയവന്‍ ഞാന്‍ മാത്രമായിരുന്നു."

ഹ.ഹ.ഹ ഇത് കേട്ടാല്‍ ആരും വിചാരിച്ചു പോകും വട്ടാണെന്ന്..
പിന്നെ?

പിന്നെ കുറെ നാള്‍ അവിടെയുമിവിടെയുമൊക്കെ അലഞ്ഞുതിരിഞ്ഞു നടന്നു.അവസാനം സ്വന്തം ഗ്രാമത്തില്‍, കുടുംബത്തിലേയ്ക്കുതന്നെ തിരിച്ചു പോയി.

അവിടെ അച്ഛന് തോട്ടങ്ങളുണ്ടായിരുന്നു.സന്തോഷത്തോടെ അച്ഛന്‍ ഒരു മധുരനാരകത്തോട്ടത്തിന്റെ ചുമതല ഫുക്കുവോക്കയ്ക്ക് വിട്ടുകൊടുത്തു.ഒന്നും ചെയ്യേണ്ടാ എന്നാണല്ലോ ഫുക്കുവോക്കയുടെ ആദര്‍ശം. വിളവെടുപ്പ് എളുപ്പമാക്കാനായി തോട്ടത്തിലെ നാരകങ്ങള്‍ വെട്ടി ഒരുക്കുന്ന ശീലമുണ്ടായിരുന്നു അക്കാലത്ത്..(ഇക്കാലത്തും.).പണിയൊന്നുമില്ലാ കൃഷിയില്‍ വെട്ടലും വേണ്ടാ എന്നു ഫുക്കുവോക്ക പറഞ്ഞു. അതോടെ നാരകങ്ങളുടെ ചില്ലകള്‍ കൂ‍ടിപ്പിണഞ്ഞു വളര്‍ന്നു..തോട്ടമാകെ കീടങ്ങള്‍ നിറഞ്ഞു.തോട്ടം നശിച്ചു.

അദ്ദേഹത്തിന്റെ അച്ഛന്‍ ആകെ വിഷമിച്ചുകാണും..

അദ്ദേഹം വിഷമിച്ചു. ഗ്രാമത്തലവനായിരുന്നു അദ്ദേഹം .ഫുക്കുവോക്കയാണെങ്കില്‍ മറ്റാള്‍ക്കാരുമായി ഇണങ്ങിപ്പോവുകയുമില്ല.മൊത്തത്തിലെല്ലാം ഒന്ന് ശരിയാവുന്നതുവരെ വേറേയെന്തെങ്കിലും ചെയ്യാന്‍ അദ്ദേഹം മകനെ ഉപദേശിച്ചു.

അപ്പോള്‍ രണ്ടാം ലോകമഹായുദ്ധം നടക്കുന്ന സമയമായിരുന്നു ‍. സൈന്യത്തിലേക്ക് ആളെ ആവശ്യമുണ്ട്.പക്ഷെ സൈന്യസേവനം അദ്ദേഹം ഇഷ്ടപ്പെട്ടില്ല.ആ സമയത്താണ് ക്വോച്ചി ജില്ലയിലെ ഗവേഷണ കേന്ദ്രം കീട രോഗ നിയന്ത്രണത്തില്‍ മുഖ്യ ഗവേഷകനായി അദ്ദേഹത്തെ ക്ഷണിച്ചത്.പിന്നെ എട്ടുകൊല്ലത്തോളം ആ ഗവേഷണ കേന്ദ്രത്തിലെ ശാസ്ത്രീയ കൃഷിവിഭാഗത്തിലെ മേല്‍പ്പരിശോധകനായി അദ്ദേഹം ജോലിനോക്കി.യുദ്ധ കാലമായതുകൊണ്ട് ഭക്ഷ്യോല്‍പ്പാദന വര്‍ദ്ധനവ് വന്‍ തോതില്‍ ആക്കാനുള്ള ഗവേഷണങ്ങളും നടത്തി.

യുദ്ധം കഴിഞ്ഞു......

ഹിരൊഷിമയിലും നാഗസാക്കിയിലും അണുഗുണ്ട് പരീക്ഷിച്ചു.

അണുബോബ് പരീക്ഷിച്ചോ..യുദ്ധത്തില്‍ പരാജയപ്പേടുത്താന്‍ അണുബോംബ് ഇട്ടതല്ലേ..

പരീക്ഷണം തന്നെയായിരുന്നു ടോം..യുദ്ധത്തില്‍ ജര്‍മ്മനിയും സഖ്യകക്ഷികളും ഏതാണ്ട് പൂര്‍ണ്ണമായും പരാജയപ്പെട്ട അവസ്ഥയിലായിരുന്നു.പരാജയപ്പെട്ടവന്റെ തലയില്‍ എന്തിനായിരുന്നു അണുഗുണ്ട് കൊണ്ടിട്ടത്..? പല പല കാരണങ്ങള്‍ പറയപ്പെടുന്നു.ശാസ്ത്ര സാഹിത്യ പരിഷത്തിന്റെ “ആയിരം സൂര്യന്മാര്‍ “എന്ന പുസ്തകത്തില്‍ ഈ കാര്യങ്ങളൊക്കെ വിശദമായി ചര്‍ച്ച ചെയ്യുന്നുണ്ട്.നമുക്ക് ദേവന്‍ മാമനോട് എഴുതാന്‍ പറയാം.നിഷ്പക്ഷമായി സത്യമറിയണേല്‍ അതേ പറ്റൂ:)

ആര്‍ വീ ജീ മേനോന്‍ സാര്‍ ഒരു പുസ്തകമെഴുതിയിട്ടുണ്ട്. ഡിറ്ററന്‍സ് എന്ന ആണവയുദ്ധതന്ത്രത്തിന്റെ മണ്ടത്തരങ്ങളെപ്പറ്റി..പേരു മറന്നു പോയി..

ഞാനും വായിച്ചിട്ടുണ്ട്..

അണുബോംബിനെപ്പറ്റിയൊക്കെ ഫുക്കുവോക്കയുടെ പുസ്തകത്തില്‍ പറഞ്ഞിട്ടുണ്ടോ?

ഏയ് , ഇല്ല..ആണവയുദ്ധവും അമിത ശാസ്ത്രീയത , സാങ്കെതികതയുമൊക്കെ വരുത്തുന്ന കുഴപ്പങ്ങള്‍ വിവരിയ്ക്കുന്നുണ്ട് . ഹിരോഷിമയിലേയും നാഗസാക്കിയിലേയും അണുഗുണ്ട് ഇടലിനെപ്പറ്റിയൊന്നും പ്രത്യേകമായി പറഞ്ഞിട്ടില്ല.

എന്തായാലും യുദ്ധത്തിനു ശേഷം ഫുക്കുവോക്ക ഗ്രാമത്തിലേക്കു തന്നെ തിരിച്ചെത്തി.കൃഷിപ്പണി തുടരാനായി...

“പിന്നെ ഒരു മുപ്പതുകൊല്ലം എനിയ്ക്ക് കൃഷി തന്നെ ജീവിതം.പുറം ലോകവുമായി ഞാന്‍ ബന്ധപ്പെട്ടിരുന്നില്ലെന്നു തന്നെ പറയാം.അക്കാലമത്രയും ഇടം വലം നോക്കാതെ പണി വേണ്ടാത്ത കൃഷിരീതിയുടെ നേര്‍ക്കായിരുന്നു എന്റെ കുതിയ്ക്കല്‍.

ഇതു ചെയ്താലെന്താ , അതു ചെയ്താലെന്താ എന്നീ ചോദ്യങ്ങള്‍ക്കു പിന്നാലെ വിദ്യകള്‍ ഓരോന്നായി നടപ്പില്‍ വരുന്നു. സാധാരണ പുതിയ ഒരു സമ്പ്രദായം രൂപപ്പെടുന്ന വഴിയിതാണ്. പരിഷൃത കൃഷിയും രൂപപ്പെട്ടത് ഈ വഴി തന്നെ.ഈ പരിപാടിയില്‍ കൃഷിക്കാരനെപ്പോഴും തിരക്കിട്ട പണിയായിരിയ്ക്കും.

പക്ഷേ നേരേ എതിരാണ് എന്റെ വഴി.സന്തോഷകരവും സ്വാഭാവികവുമായ ഒരു കൃഷിരീതിയായിരുന്നു എന്റെ ലക്ഷ്യം.കൃഷിയില്‍ പണി ക്രമത്തില്‍ കൂടരുത്.. കുറയുകയും വേണം.“അത് ചെയ്തില്ലെങ്കിലെന്താ..ഇത് ചെയ്തില്ലെങ്കിലെന്താ..” എന്നായിരുന്നു എന്റെ ചിന്താഗതി. ഓടുവില്‍ ഞാനെത്തിച്ചേര്‍ന്നത് ഉഴമ വേണ്ടാ, കമ്പോസ്റ്റ് വേണ്ടാ, യന്ത്രം വേണ്ടാ, രാസവളവും കീടാനാശിനികളും വേണ്ടാ എന്ന നിലപാടിലാണ്.ഈ തലത്തിലെത്തിയാല്‍ യഥാര്‍ത്ഥത്തില്‍ വേണ്ടതായ കൃഷിപ്പണികള്‍ ഒത്തിരി കുറവാകും.“

(പണി വേണ്ടാത്ത കൃഷി, ഒറ്റ വൈക്കോല്‍ വിപ്ലവം , മസനോബു ഫുക്കുവോക്കാ)

കീടനാശിനി വേണ്ടാ, രാസവളം വേണ്ടാ എന്നൊക്കെ മനസ്സിലായി. ഞങ്ങളുടെ അടുക്കളത്തോട്ടത്തില്‍ രാസവളവും കീടനാശിനികളും ഉപയോഗിയ്ക്കാറില്ല.പക്ഷേ കമ്പോസ്റ്റും ഉഴവും വേണ്ടാ എന്നു പറഞ്ഞാല്‍ എങ്ങനെ അംഗീകരിയ്ക്കാന്‍ പറ്റും ? ഉഴവില്ലാതെ എങ്ങനെ കൃഷി ചെയ്യും?

അതു തന്നെയാ‍ണ് എല്ലാവരും ചോദിയ്ക്കുന്നത്. പക്ഷേ ഫുക്കുവോക്ക പറയുകയല്ല ചെയ്തത്. പ്രവര്‍ത്തിച്ചു കാണിച്ചു തരുന്നു. മുപ്പതു കൊല്ലമായിട്ട് അദ്ദേഹത്തിന്റെ വയലുകളില്‍ മണ്ണിളക്കിയിട്ടില്ല.വളങ്ങള്‍ ചേര്‍ത്തിട്ടില്ല.ഒന്നും ചെയ്തിട്ടില്ല.എന്നാലും ജപ്പാനിലെ പ്രമുഖ കൃഷിയിടമായ ഐഹം ജില്ലയിലെ ഏറ്റവും മുന്തിയ വിളവിനൊപ്പം നെല്ല് ഫുക്കുവോക്കയ്ക്ക് ലഭിയ്ക്കുന്നു.മറ്റ് വിളകളും അങ്ങനെ തന്നെ.

അങ്ങനെയെങ്കില്‍ അദ്ദേഹം എങ്ങനെയാണ് ഞാറു നടുന്നത്?
സന്തോഷിന് ഞാറുനടലെന്നൊക്കെ അറിയാമോ?
ഞങ്ങള്‍ക്ക് വയലുണ്ട്.ചെല പൂവിനു കൃഷിയിറക്കും.

ഫുക്കുവോക്കയുടെ രീതിയില്‍ ഞാറുനടലില്ല..വിതയേയുള്ളൂ.തണുപ്പുകാലത്ത് ധാന്യങ്ങള്‍ കൊയ്യാറാവുന്നത് മേയ് മാസം ഒടുവിലാണ്. കൊയ്ത്തിനു രണ്ടാഴ്ച മുന്‍പ് ബാര്‍ലിയും വരകും നില്‍ക്കുന്ന കണ്ടങ്ങളില്‍ നെല്ലു വിതയ്ക്കും.
ബാര്‍ലിയും വരകും കൊയ്തു കഴിഞ്ഞ് വൈക്കോല്‍ വയലില്‍ തിരികെ കൊണ്ടിടും.വിത തീര്‍ന്നു.

കൊയ്ത്തിനു മുന്‍പ് വിതയ്ക്കുകയോ.അപ്പോ....ആകെ പ്രശ്നമായല്ലോ..എനിയ്ക്കൊന്നും മനസ്സിലായില്ല..

എടാ..ഒരു പൂവു കൊയ്യുന്നതിനു മുന്‍പ് അതേ വയലില്‍ കൊയ്യാറായി നില്‍ക്കുന്ന വിളയുടെ മുകളില്‍ അടുത്ത പൂവിനുള്ള കൃഷിയിറക്കുന്നു..പരമ്പരാഗതമായോ ആധുനികമായോ നമ്മള്‍ കേട്ടിട്ടേയില്ലാത്ത രീതിയായതുകൊണ്ടാണീ അത്ഭുതം.

കൃഷി എന്നു പറഞ്ഞാല്‍ നമുക്ക് പൂട്ടല്‍, മരമടി ,കിള, വെട്ട് കുത്ത് ഇതൊക്കെയാണല്ലോ..ഇതില്‍ അതൊന്നുമില്ല വെറുതേ വിതയ്ക്കുക ..കൊയ്യുക..അത്രന്നെ.

അപ്പൊ വേരുപടലങ്ങള്‍ക്ക് വളരാനൊന്ന് മണ്ണിളക്കുക കൂടി വേണ്ടേ..?

അതില്‍ പല കാര്യങ്ങളുണ്ട്.ഗവേഷണ ശാലകള്‍ പുറത്തിറക്കുന്ന വിത്തുകള്‍ സാധാരണയായി ഈ രീതിയില്‍ ഉപയോഗിയ്ക്കാറില്ല.അത് രാസവളവും കീടനാശിനികളും നല്‍കിയാല്‍ മാത്രം അതിജീവിയ്ക്കാന്‍ ഉണ്ടാക്കിയതാണെന്നതാണ് കാരണം..ഒരോരോ പ്രദേശങ്ങള്‍ക്കും അതിന്റെ തനതായ കാലാവസ്ഥയിലൂടെയും ഭൂപ്രകൃതിയിലൂടെയും ഉരുത്തിരിഞ്ഞു വന്ന വിത്തു വര്‍ഗ്ഗങ്ങളുണ്ടാകും.അത്തരം വിത്തുകളായിരിയ്ക്കും പ്രകൃതികൃഷിയില്‍ ഉപയോഗിയ്ക്കുക.അവയ്ക്ക് ആ പ്രദേശത്തെ മണ്ണില്‍ നില്‍ക്കാനാവശ്യമായ വേരുപടലങ്ങളുണ്ടാ‍കും.അവയില്‍ നിന്ന് ആ നിലത്തിനു വേണ്ടിയുള്ള ഏറ്റവും നല്ല വിത്തിനം കൊല്ലങ്ങള്‍ കൊണ്ട് ഉണ്ടാക്കിയെടുക്കണം.കൊല്ലങ്ങളായി തിരഞ്ഞെടുത്തുള്ള പ്രജനനം വഴി.

അപ്പൊ ഐ ആര്‍ എട്ട്, ജയ, കാവേരി ഇതൊന്നും പറ്റൂലേ?

പറ്റില്ലെന്നു പറയാനാകില്ല. രാസവളമില്ലാതെ ആ വിത്തിനങ്ങള്‍ നല്ല വിളവു തരുന്നുണ്ടെങ്കില്‍ നല്ലത്. ഈ ഐ ആര്‍ എട്ടിന്റേയും മറ്റും തള്ളിച്ചയില്‍ എത്രയെത്ര പഴയ വിത്തിനങ്ങള്‍ നമുക്ക് നഷ്ടപ്പെട്ടിരിയ്ക്കുന്നു?

ശരിയാണ്..പഴയ വിത്തുകളെപ്പറ്റി അമ്മമ്മ ഇന്നലെ പറഞ്ഞതേയുള്ളൂ..എന്താ..ചേറായിയൊ?

അത് ചേറാടിയായിരിയ്ക്കും..വെള്ളക്കെട്ടുണ്ടായാലും നശിച്ചുപോകാത്ത ഒരിനം വിത്തായിരുന്നത്..ഇപ്പൊ കിട്ടാനേയില്ല..അങ്ങനെപലതും...
മരങ്ങളില്‍ ഒട്ടുമാവുകളും നാടന്‍ മാവുകളും നൊക്കൂ..നാട്ടില്‍ ഒരു സമയത്ത് നാട്ടുമാങ്ങാ പലതരം, മൂവാണ്ടന്‍, കൊളമ്പി, കിളിച്ചുണ്ടന്‍, മൊന്തന്‍, വെള്ളരിമാങ്ങ തുടങ്ങി എത്രയെത്ര മാങ്ങകളായിരുന്നു.ഇന്ന് എല്ലായിടത്തും ഒട്ടുമാവുകള്‍ മാത്രം.
ഒട്ടുമാവില്‍ നിന്ന് ഒറ്റ മാങ്ങ പുഴുവില്ലാതെ കിട്ടില്ല..പിന്നെ പുഴു വരാതിരിയ്ക്കാന്‍ മരുന്നടി, പുകയ്ക്കല്‍ , തീയിടല്‍..എന്തെല്ലാം ജോലികളാണ്...മരുന്നടിച്ച മാങ്ങ തിന്ന് അസുഖം വരും. പിന്നെ അസുഖം മാറ്റാന്‍ ആശുപത്രി, മരുന്ന്..ആ മരുന്ന് തിന്നുണ്ടായ അസുഖം മാറ്റാന്‍ വീണ്ടും മരുന്ന്.....
നാട്ടുമാവില്‍ ഒറ്റ പുഴുവിനെ കണ്ടിട്ടുണ്ടൊ?

അതേ ..ഒരു ഓഫ് ..:) പണ്ടേ ആരോടെങ്കിലും ചോദിയ്ക്കണമെന്ന് വിചാരിച്ചതാണ്..എങ്ങനാ വെളീയിലൊരു തുള പോലുമില്ലാതെ മാങ്ങയ്ക്കകത്ത് പുഴു കയറുന്നത്?

പുഴു കയറുന്നതല്ല മഹേശാ..മാവിന്റെ പൂവില്‍ പുഴുവിന്റെ അമ്മപ്പക്കി മുട്ടയിടും..പൂവ് വളര്‍ന്ന് മാങ്ങയാകുമ്പോള്‍ മുട്ട വിരിഞ്ഞ് പക്കിയുടെ ലാര്‍വയായ പുഴുവാകും..അതങ്ങനെ മാങ്ങയ്ക്കകത്താകും..പിന്നെ വലുതാകുമ്പോ മാങ്ങ തുളച്ച് പക്കിയായി പുറത്ത് കടക്കും..അതാണ് കാര്യം..

പക്കിയെന്താ നാടന്‍ മാവിന്റെ പൂ‍വില്‍ മുട്ടയിടാത്തേ?

ആവോ അറിയില്ല..ചിലപ്പൊ ഇഷ്ടമല്ലായിരിയ്ക്കും..അല്ലേല്‍ ചിലപ്പോ പക്കിയെ ആ‍കര്‍ഷിയ്ക്കുന്ന ഏതെങ്കിലും രാസവസ്തു ആ മാങ്ങയിലില്ലായിരിയ്ക്കും..ഗവേഷിയ്ക്കേണ്ട കാര്യം തന്നെ. കാലാ കാലങ്ങളായി അതാതു നാടുകളിലെ കീടവും മാവും തമ്മിലുള്ള ഒരു മത്സരത്തിന്റെ സ്വാഭാവികമായ പരിണാമമാണ് ഇന്നത്തെ അതാതു നാട്ടിലെ മാവുകള്‍. ആ നാട്ടിലെ കീടങ്ങള്‍ വ്യാപകമായൊരു നാശം വരുത്തുന്ന വര്‍ഗ്ഗം ആ നാട്ടില്‍ വളരില്ല..അത് വേറേ നാട്ടിനുള്ളതാണ്. പ്രകൃതിയില്‍ അങ്ങനെയൊരു സംതുലനമുണ്ട്..ആവശ്യമില്ലാതെ അതില്‍ ഇടപെടുമ്പോഴാണ് നാം പ്രശ്നക്കുരുക്കില്‍ പെട്ടു പൊകുന്നത്..

ഓഹോ ഇതാണ് നാച്ചുറല്‍ സെലക്ഷന്‍ അല്ലേ..അതിജീവനം..പരിണാമം..

എന്നു വേണമെങ്കില്‍ പറയാം..പരിണാമ സിദ്ധാന്തത്തിന്റെ കാതല്‍ ഇതു തന്നെ.

നമുക്ക് പ്രകൃതി കൃഷിയുടെ നാലു തത്വങ്ങള്‍ ഫുക്കുവോക്ക പറയുന്നത് നോക്കാം..

(ഒന്ന്) മണ്ണിളക്കരുത്അതായത് കിളയ്ക്കാനോ ഉഴാനോ പാടില്ല..

എനിയ്ക്കിനിയും ഈ തത്വത്തിനെ അങ്ങോട്ട് വിശ്വാസമായിട്ടില്ല..മണ്ണിളക്കാതെ എങ്ങനെ?
മഹേശന്‍ കാട്ടില്‍ പോയിട്ടുണ്ടോ?

ഉണ്ട്..ടൂറിനു പോയപ്പൊ നെല്ലിയാമ്പതിയില്‍ പോയിട്ടുണ്ട്..
കാട്ടിലെ ചെടികളില്‍ എന്തെങ്കിലും കുഴപ്പം കണ്ടിട്ടുണ്ടോ?ആരും അവിടെ മണ്ണിളക്കുന്നില്ലല്ലോ,അടിക്കാട്ടില്‍ പല തരം പുല്ലുകള്‍, അനേകായിരം കുറ്റിച്ചെടികള്‍, ചെറുവൃക്ഷങ്ങള്‍, മേല്‍ക്കാട്ടില്‍ വന്‍ മരങ്ങള്‍, വള്ളികള്‍ ഇവയൊക്കെ ഏതു തോട്ടത്തേക്കാളും പുഷ്ടിയോടെ നില്‍ക്കുന്നില്ല്ലേ..അതാണ് പ്രകൃതിയുടെ കൃഷി.നമ്മളത് അനുകരിച്ചാല്‍ മതി...

മണ്ണില്‍ ആവശ്യത്തിനു ജൈവാംശമുണ്ടേല്‍ മണ്ണിര, പലതരം പ്രാണികള്‍, സൂക്ഷ്മ ജീവികള്‍ ഇവയൊക്കെ നന്നായി വളരും.അവിടെയൊക്കെ ഏത് ഇളക്കിയ നിലത്തെക്കാളും നന്നായി ഇളകിയ മണ്ണായിരിയ്ക്കും. മണ്ണിരയെ കര്‍ഷകന്റെ ഉഴവുകാരന്‍ എന്നു തന്നെയാണല്ലോ വിളിയ്ക്കുന്നത്.ഏറ്റവും വലിയ ഉഴവുകാരന്‍ അവന്‍ തന്നെ.

അപ്പൊ മണ്ണിര കമ്പോസ്റ്റും ചേര്‍ക്കണ്ടേ?

ഒരു കമ്പോസ്റ്റും വേണ്ടാ എന്നാണ് ഫുക്കുവോക്കയുടേ മതം. ജൈവാംശം കൂട്ടിക്കൊടുത്ത് മണ്ണിന്റെ പുഷ്ടി കൂട്ടിയാല്‍ അതാതിടത്തിനു പറ്റിയ തരം മേല്‍മണ്ണിളക്കലുകാര്‍ തനിയേ ഉണ്ടായി വരും.അതിനു കമ്പോസ്റ്റൊന്നും വേണ്ടാ..ജൈവ വസ്തുക്കളായ വൈക്കോല്‍, ഇലകള്‍ ഇവയൊക്കെ കൊണ്ട് പുതയിട്ടാല്‍ തന്നെ മതി..

ഫുക്കുവോക്കയുടെ രണ്ടാമത്തെ തത്വം രാസവളമോ മറ്റേതെങ്കിലും വളമോ ചേര്‍ക്കരുത് എന്നാണ്..നമ്മള്‍ എത്രകണ്ട് കാര്യങ്ങള്‍ ചെയ്ത് പ്രകൃതിയില്‍ നിന്നകലുന്നോ അത്രത്തോളം തിരിഞ്ഞ് ചുറ്റേണ്ടി വരുമെന്നാണ് ഫുക്കുവോക്ക പറയുന്നത്.സസ്യ ജന്തുജീവിതത്തിന്റെ ചാക്രിക പ്രവര്‍ത്തനം വഴി മണ്ണ് താനേ പുഷ്ടിപ്പെട്ടോളും എന്നാണ് അദ്ദേഹത്തിന്റെ അഭിപ്രായം.വയലില്‍ നിന്നെടുക്കുന്നതെല്ലാം വയലിലേയ്ക്ക് തിരിച്ചെത്തിക്കണം എന്ന അഭിപ്രായക്കാരനാണ് അദ്ദേഹം. വൈക്കോല്‍ വയലില്‍ തന്നെ വിതറുന്നത് ഒരുദാഹരണം..

വൈക്കോലൊ,,അത് പശുവിനു തിന്നാല്‍ വേണ്ടേ..?

പശുവിന് പച്ചപ്പുല്ല് മതി.പിന്നെ ഉണക്കുകാലത്തേയ്ക്ക് പശുവിനു വൈക്കോല്‍ വേണമെങ്കില്‍ മുഴുവന്‍ ചാണകവും തിരിച്ച് വയലിലെത്തിയ്ക്കുക..ഓരോരോ സ്ഥലത്തും അതാതിടത്തിന്റെ സാംസ്കാരിക , ഭൂപ്രകൃതിയ്ക്കനുസരിച്ച് കൃഷി ചെയ്യണമെന്നാണ് അദ്ദേഹം പറയുന്നത്.

കള നശിപ്പിയ്ക്കരുത് എന്നാണ് മൂന്നാം തത്വം..കള നശിപ്പിയ്ക്കരുത് നിയന്ത്രിയ്ക്കാം.അതിനായി പയറുവര്‍ഗ്ഗങ്ങളുടെ വിരിപ്പ്, വൈക്കോള്‍ പുതപ്പ് , വയലിലാണേല്‍ വെള്ളം നിര്‍ത്തല്‍ തുടങ്ങിയ പരിപാടികള്‍ ഉപയോഗിയ്ക്കാം.

വൈക്കോല്‍ വിരിപ്പ് എങ്ങനെ കളയെ നശിപ്പിയ്കും?

വളര്‍ന്നു വരുന്ന കളകള്‍ക്ക് സൂര്യപ്രകാശം കിട്ടില്ല ..അങ്ങനെ അത് നശിച്ചു പോകും..

പയറുവര്‍ഗ്ഗങ്ങള്‍ കൊണ്ട് പുതയിടല്‍ എന്നാലെന്താ?

കളകളായി പയറുവര്‍ഗ്ഗച്ചെടികള്‍ ഉപയോഗിയ്ക്കുക...വെറുതേ പയറ് വിതച്ചുകൊടുത്താല്‍ മതി..കുറച്ചു കഴിയുമ്പോള്‍ പയറുചെടികള്‍ മറ്റ് കളകളുടെ സ്ഥാനമേറ്റെടുക്കുകയും മണ്ണ് ഫലപുഷ്ടിയുള്ളതായിത്തീരുകയും ചെയ്യും.

പയറുവര്‍ഗ്ഗച്ചെടികള്‍ മണ്ണിനെ ഫലപുഷ്ടിയുള്ളതാകുമോ?ചെടി വളരുമ്പോള്‍ മണ്ണില്‍ നിന്ന് വളം വലിച്ചെടുക്കുകയല്ലെ ചെയ്യുന്നത്..?
ആക്കും..അതിനുത്തരം ഞാന്‍ പറയാം..പയറുചെടികളുടെ വേരില്‍ റൈസോബിയം ഇനത്തില്‍ പെട്ട ബാക്റ്റീരിയാകളുണ്ട്..അവ അന്തരീക്ഷത്തില്‍ നിന്ന് നൈട്രജന്‍ വലിച്ചെടുത്ത് ചെടികള്‍ക്ക് ആഗിരണം ചെയ്യാന്‍ പറ്റുന്ന രീതിയിലുള്ള നൈട്രേറ്റുകളായി മാറ്റും..അങ്ങനെ മണ്ണ് ഫല പുഷ്ടിയുള്ളതായിത്തീരും..

അങ്ങനെ മൂന്നു തത്വം കഴിഞ്ഞു..നാലാമത്തെ തത്വം
നിങ്ങള്‍ക്കെല്ലാമറിയാം..രാസവസ്തുക്കള്‍ കൃഷിയ്ക്കായി ഉപയോഗിയ്ക്കരുത്..

അത് പൂര്‍ണ്ണമായും ശരിതന്നെ:)
പിന്നേ ഫുക്കുവോക്ക നെല്ലും പയറും മാത്രമേ ഉണ്ടാക്കാറുള്ളോ?

അല്ലപ്പാ..മധുരനാരങ്ങാത്തോട്ടം നശിപ്പിച്ചുകൊണ്ടാണല്ലോ പുള്ളിയുടെ
രംഗപ്രവേശം.:).എല്ലാത്തരം വിളകളും അദ്ദേഹം ഉണ്ടാക്കുന്നു.നാരങ്ങാ, പച്ചക്കറികള്‍, ഫലവര്‍ഗ്ഗങ്ങള്‍..ഫലവര്‍ഗ്ഗത്തോട്ടത്തില്‍ പുതപ്പുചെടികളായി പയറുവര്‍ഗ്ഗച്ചെടികള്‍ വച്ചുപിടിപ്പിയ്ക്കുക.അവയും പകുതി കാടന്‍ മട്ടില്‍ തന്നെ വളര്‍ത്തുക..പച്ചക്കറികളും അങ്ങനെ തന്നെ. മാത്രമല്ല ഇങ്ങനെയുണ്ടാകുന്ന പച്ചക്കറികളുടെയും പഴങ്ങളുടെയും രുചിയും കൂടുതലായിരിയ്ക്കുമെന്നാണ് ഫുക്കുവോക്കയുടെ അനുഭവം.

മനുഷ്യ രാശിയുടെ ഇന്നത്തെ മൊത്തത്തിലുള്ള രീതികളില്‍ യോജിയ്ക്കാത്തായാളാണ് ഫുക്കുവോക്ക.ഒരു ശാസ്ത്രജ്ഞനായതുകൊണ്ടാവണം ശാസ്ത്രജ്ഞരെ പുള്ളി വെറുതേ വിടാറില്ല. പല ഗവേഷണത്തിന്റേയും മണ്ടത്തരങ്ങളെപ്പറ്റി അദ്ദേഹം പറയുന്നുണ്ട്..ഗവേഷകനുണ്ടാവേണ്ട മൊത്തമായ വീക്ഷണം അദ്ദേഹം എടുത്തു പറയുന്നു.എല്ലാത്തിനേയും വേറേ വേറേ കണ്ട് പഠിയ്ക്കുന്ന രീതി അദ്ദേഹത്തിന് ഒട്ടും ഇഷ്ടമല്ല. എല്ലാത്തിനേയും അതിന്റെ മുഴുവനായും കണ്ട് ഗവേഷണം നടത്തണമെന്നാണ് അദ്ദേഹത്തിന്റെ അഭിപ്രായം.

എനിയ്ക്കൊന്നും മനസ്സിലായില്ലെന്റണ്ണാ..:)

ഞാന്‍ ഫുക്കുവോക്ക എഴുതിയതു തന്നെ വായിയ്ക്കാം

“ ഒരിയ്ക്കല്‍ ഒരു ഗവേഷണ കെന്ദ്രത്തില്‍ നിന്ന് ഒരു മാന്യനിവിടെ വന്നു.എന്റെ വയലിലെ മുഞ്ഞയ്ക്കും ചിലന്തിയ്ക്കും തമ്മിലുള്ള ബന്ധത്തെകുറിച്ചു പഠനം നടത്താന്‍ വന്നതാണ്. അദ്ദേഹത്തോട് ഞാന്‍ പറഞ്ഞു.

“മുഞ്ഞയെ നശിപ്പിയ്ക്കുന്ന അനേകം ജീവികളുണ്ട്.അവയിലൊന്നായ ചിലന്തിയില്‍ മാത്രമാണ് നിങ്ങള്‍ക്ക് താല്‍പ്പര്യം.ഇക്കൊല്ലം ചിലന്തികള്‍ ഒരുപാടുണ്ട്.കഴിഞ്ഞകൊല്ലം ചെറുതവളകളും അതിനും മുന്‍പ് പെരുംതവളകളുമായിരുന്നു ആധിപത്യം പുലര്‍ത്തിയിരുന്നത്.അത്തരം ജാതികളനേകമുണ്ട്.“

പ്രശ്നത്തിന്റെ ഒരുവശം മാത്രം പരിഗണിയ്ക്കുന്ന ഗവേഷണം കൊണ്ട് പ്രാണികള്‍ തമ്മിലുള്ള അന്യോന്യ ബന്ധത്തിന്റെ നൂലാമാലയ്ക്കുള്ളില്‍, ഒരു പ്രത്യേക സന്ദര്‍ഭത്തില്‍ ഒരു പ്രത്യേക ഇരപിടിത്തക്കാരന്റെ പങ്കെന്തെന്നു ഗ്രഹിയ്ക്കുക അസാധ്യം തന്നെയാണ്.

ചിലന്തികള്‍ പെരുകുന്നതിനാല്‍ മുഞ്ഞ കുറഞ്ഞേക്കും. ഒരുപാടു മഴയുള്ളപ്പോള്‍ തവളകളാകും മുഞ്ഞയെ ഒടുക്കുന്നത്.അല്ലെങ്കില്‍ മഴകുറവും മുഞ്ഞയും തവളയും വിരളവുമായ കാലങ്ങളുമുണ്ട്.

ഷഡ്പദ പ്രാണികളുടെ അന്യോന്യ ബന്ധം കണക്കിലെടുക്കാതെയുള്ള കീട നിവാരണ രീതികള്‍ ഫലപ്രദമല്ല.മുഞ്ഞയേയും ചിലന്തിയേയും കുറിച്ചുള്ള ഗവേഷണം ചിലന്തിയ്ക്കും തവളയ്ക്കുമുള്ള ബന്ധത്തെക്കുറിച്ചും ആലോചിയ്ക്കണം..അപ്പോള്‍ ഒരു തവള വിദഗ്ധന്‍ കൂടി വേണ്ടി വരും..അപ്പോള്‍ തവള ചിലന്തി മുഞ്ഞ നെല്ല് ജലനിയന്ത്രണം ഇങ്ങനെ അനേകം വകുപ്പുകളുടെ വിദഗ്ധര്‍ ആവശ്യമാണ് അന്വേഷക സംഘത്തിലെന്നു വരുന്നു..
(ഒറ്റവൈക്കോല്‍ വിപ്ലവം, മസനോബു ഫുക്കുവോക്ക)

ഇപ്പൊ മനസ്സിലായോ?

അങ്ങനെ മര്യാദയ്ക്ക് പറയൂ..:)

നിങ്ങളൊക്കെ ഗവേഷണം ചെയ്യുമ്പോള്‍ ഇങ്ങനെ മൊത്തമായൊരു വീക്ഷണം വച്ചു വേണം കാര്യങ്ങളെ നോക്കാന്‍..കേട്ടോ..അതത്ര എളുപ്പമൊന്നുമല്ല..

ഗവേഷകരാവുമ്പോഴല്ലേ...:) .ചെയ്യാം...എന്നേ ചെയ്തു..ഹ ഹ ഹ

ഞാന്‍ സീരിയസാവുമ്പൊ കളിയാക്കുന്നോ..പോടാ ..ഞാന്‍ ലോഗൌട്ട് ചെയ്തു..

ചുമ്മാതല്ല ലോ ഗൌട്ട് പിടിയ്ക്കുന്നത്..പിണങ്ങാതെ കണ്ണാ..പോവല്ലേ..ചോദിയ്ക്കട്ട് ഈ പ്രകൃതി കൃഷി ജപ്പാനില്‍ മാത്രമേയുള്ളോ?

ഏയ് അല്ലടാ..ഇന്ന് ലോകമെമ്പാടും ഫുക്കുവോക്കയുടെ രീതിയില്‍ ആള്‍ക്കാര്‍ കൃഷി ചെയ്യുന്നു.പ്രകൃതികൃഷി ഭാരതിയര്‍ക്ക് പുത്തനൊരാശയമല്ലെന്ന് റസൂലിയായില്‍ പ്രകൃതികൃഷി നടത്തുന്ന പ്രതാപ് സി അഗര്‍വാള്‍ പറയുന്നു.രിഷി പഞ്ചമി നാളില്‍ ഉപവസിയ്ക്കുന്നവര്‍ കൊഴുവും കിളയുമേല്‍ക്കാത്ത മണ്ണിലുണ്ടായ ആഹാരമാണ് കഴിയ്ക്കേണ്ടതത്രേ..മാമുനിമാരുടെ ഭക്ഷണവും കിളയ്ക്കാത്ത, പൂട്ടാത്ത മണ്ണില്‍ നിന്നുണ്ടാകുന്ന വിളകളായിരുന്നെന്ന് ചില ഗ്രന്ധങ്ങളില്‍ പറയുന്നു......

അതല്ലേലും റൊക്കറ്റ് കണ്ടു പിടിച്ചതും ആറ്റം കണ്ടു പിടിച്ചതും അണുബോബുണ്ടാക്കിയതുമെല്ലാം ഭാരതീയരാരുന്നെന്ന് പറഞ്ഞുനടക്കാറുണ്ട്

ഹ ഹ ഹ..ഇതതുപോലല്ലെടാ..എല്ലാ പഴയ സംസ്കാരങ്ങളിലും ഇത്തരം അറിവുകളുണ്ട്.ജപ്പാനിലും പുരാതനകാലത്ത് ഇതേരീതിയില്‍ തന്നെയായിരുന്നു കൃഷി. പിന്നീടെപ്പോഴോ വാണിജ്യവും കൃഷിയും ഇടകലര്‍ന്ന് വന്നപ്പോഴാണ് കാര്യം കൈവിട്ട് പോയത്..ലളിതമാണ് കൃഷി..ഏറ്റവും നല്ല ജോലിയാണത്..സുന്ദരവും..

ഫുക്കുവോക്ക പറയുന്നു..

പുത്തന്‍ കൃഷിയില്‍ കര്‍ഷകനു കവിതയെഴുതാനോ പാട്ടുകെട്ടാനോ നേരമില്ല..
കഴിഞ്ഞൊരുനാള്‍ ഗ്രാമത്തിലെ അമ്പലം വൃത്തിയാക്കുകയായിരുന്നു ഞാന്‍.ചുവരില്‍ തൂങ്ങുന്ന ചില അലങ്കാരത്തട്ടങ്ങള്‍ എന്നെ അത്ഭുതപ്പെടുത്തി.പൊടി തുടച്ചു നൊക്കുമ്പോള്‍ മായാന്‍ തുടങ്ങുന്ന അക്ഷരത്തട്ടങ്ങളില്‍ കണ്ടത് അനേകം ഹൈക്കു കവിതകളാണ്.
ഇത്തരമൊരുള്‍നാട്ടില്‍ പോലും അനേകം പേര്‍ കവിതച്ചൊല്ലുകളെഴുതി അമ്പലത്തിലേയ്ക്ക് വഴിപാട് ചെയ്തിരിയ്ക്കുന്നു.ആളുകളുടെ അസ്തിത്വ സീമകള്‍ മുങ്കാലങ്ങളില്‍ എത്ര വിശാലമായിരുന്നു എന്നാണിത് വ്യക്തമാക്കുന്നത്.
ഈ കവിതച്ചൊല്ലുകള്‍ പലതിനും പല നൂറ്റാണ്ടുകളുടെ പഴക്കമുണ്ട്.അവയുടെ കെട്ടുകാര്‍ എത്ര ദരിദ്രരായിരിയ്ക്കും? എന്നാല്‍ കവിതയ്ക്ക് പിറക്കാനൊക്കുന്ന മട്ടില്‍ വിശാലമായിരുന്നു അവരുടെ ജീവിത മണ്ഡലം........................
ഇവിടെ ഈ ചെറിയ വയലും കാത്ത് ഓരോ ദിനത്തിന്റെ സമ്പൂര്‍ണ്ണതയും സ്വച്ഛന്തതയും മുഴുവന്‍ സ്വന്തമാക്കി കഴിയുകയാണ് കൃഷിയുടെ നേരായ വഴി..

(ഒറ്റവൈക്കോല്‍ വിപ്ലവം , മസനോബു ഫുക്കുവോക്ക)

നല്ല ആശയം..ലളിതമായ ജീവിതം..കേരളത്തില്‍ ഇത്തരം കര്‍ഷകരുണ്ടോ?

കേരളത്തിലും വളരെയെധികമാള്‍ക്കാര്‍ പ്രകൃതി കൃഷിയിലേയ്ക്ക് ആകൃഷ്ടരായിട്ടുണ്ട്..ആലപ്പുഴയിലെ ശ്രീ കേ വീ ദയാല്‍ (അദ്ദേഹമാണ് ഒറ്റവൈക്കോല്‍ വിപ്ലവത്തിന്റെ മലയാള പരിഭാഷയ്ക്ക് അവതാരിക എഴുതിയിരിയ്ക്കുന്നത്) പ്രമുഖനായ ഒരു പ്രകൃതി കര്‍ഷകനാണ്. അട്ടപ്പാടിയിലെ‍ ഗോപാലകൃഷ്ണന്‍ മാഷും വിജയലക്ഷ്മി ടീച്ചറും നെതൃത്വം നല്‍കുന്ന സാരംഗ് എന്ന കൂട്ടായ്മ മറ്റൊരു ഉദാഹരണമാണ്.

കേരളമൊട്ടാകെ പ്രകൃതി രീതിയില്‍ കൃഷി ചെയ്യുന്ന കൂട്ടായ്മകള്‍ ഉണ്ടായി വരുന്നു.കൂടുതല്‍ കാര്യങ്ങള്‍ നമ്മുടെ ആഷേച്ചി പറഞ്ഞുതരും..

അമ്പിയണ്ണന്‍ പ്രകൃതി കൃഷി ചെയ്തിട്ടുണ്ടോ..?

ഉണ്ടല്ലോ..പണ്ട് പ്രീഡിഗ്രിയ്ക്ക് പഠിയ്ക്കുമ്പോള്‍ വീട്ടില്‍ ഞാ‍ന്‍ ചെറിയ രീതിയിലൊക്കെ ഇത് പരീക്ഷിച്ചിട്ടുണ്ട്..പക്ഷെ പരമ്പരാഗത കൃഷി രീതികളില്‍ നിന്ന് വിട്ടുമാറാന്‍ അമ്മയുമച്ഛനുമൊന്നും സമ്മതിച്ചിട്ടില്ല..അവരെന്നെ ഓടിയ്ക്കും..പിന്നെ നമ്മുടെ വകയായി പുരയിടത്തിന്റെ മൂലയ്ക്ക് അല്‍പ്പം പ്രകൃതിരീതിയില്‍ പരീക്ഷണങ്ങളൊക്കെ നടത്തി നോക്കിയിട്ടുണ്ട്.പക്ഷേ ഏതു ഗവേഷണത്തിന്റെയും അത്യാവശ്യ ഘടകമായ രേഘപ്പെടുത്തല്‍ ഞാന്‍ ചെയ്തിട്ടില്ല..ഒന്നും എഴുതി വച്ചിട്ടില്ല എന്നു സാരം..അതുകൊണ്ട് തന്നെ മനസ്സില്‍ നിന്ന് പറയാനേ പറ്റൂ..പ്രകൃതിരീതി ഫലപ്രദം തന്നെയാണ്..നിങ്ങളില്‍ താല്‍പ്പര്യമുള്ളവര്‍ ചെയ്തു നോക്കൂ..പച്ചക്കറിയില്‍ തുടങ്ങാം ..നിരീക്ഷണങ്ങള്‍ എഴുതി വയ്ക്കാന്‍ മറക്കരുത് കേട്ടോ..

ഫുക്കുവൊക്കയുടെ രീതി ഒരു കൃഷിയുടെ രീതിയെന്നതിലുപരി ഒരു ജീവിതചര്യയാണ്.തത്വശാസ്ത്രമാണ്.. പ്രകൃതിയോടിണങ്ങിച്ചേര്‍ന്ന് അധികമൊന്നും ആയാസപ്പെടാതെ ഉല്ലാസത്തോടെ ജീവിയ്ക്കുന്ന ഒരു ജീവിതചര്യ..അത് ഒരു മുട്ടന്‍ കാര്യമായൊന്നും എടുക്കേണ്ടതില്ല..തനിയേ അതിനുള്ള മാനസികാവസ്ഥ വരും.ഒന്നിനും പിറകേ ഓടാതെ, ഒന്നിനോടും മത്സരമില്ലാതെ, വരുന്നതിനെ സ്വീകരിച്ച് , രസിച്ച് ചിരിച്ച് കളിച്ച്..അങ്ങനെയങ്ങനെ......

“ഈ വൈക്കോല്‍ കൊണ്ട് ഞാനൊറ്റയ്ക്ക് തുടങ്ങും ഒരു വിപ്ലവം..“

നിശബ്ദരായി കേട്ടുകൊണ്ടിരുന്ന യുവാക്കള്‍ ചിരിച്ചാര്‍ത്തു..

“ഒരു ഒറ്റയാള്‍ വിപ്ലവം..നാളെ നമുക്ക് വലിയൊരു ചാക്കു നിറയേ നെല്ല് ബാര്‍ലി ക്ലോവര്‍ വിത്തുകള്‍ ചുമലിലേറ്റുക ഒകു നിനു ഷി-നോ-മിക്കോട്ടയെപ്പോലെ* റ്റെക്കൊഡാ വയലുകളിലെല്ലാം വിത്തു വിതറുക..“

“അതൊരു ഒറ്റയാള്‍ വിപ്ലവമല്ല“ ഞാനും ചിരിച്ചു..“ഒറ്റവൈക്കോല്‍ വിപ്ലവമാകുന്നു.“

കുടില്‍ വിട്ടു പോക്കുവെയിലിലെത്തിയ ഞാന്‍ ഒരു നിമിഷം നിന്നു.ഫലങ്ങളുടെ ഭാരം കൊണ്ട് കുനിഞ്ഞ് നില്‍ക്കുന്ന മരങ്ങള്‍ കണ്ടു.കളകള്‍ക്കും ക്ലോവറിനുമിടയില്‍ ചിക്കിച്ചികയുന്ന കോഴികളെ നോക്കി പതിവിന്‍പടി ഞാന്‍ വയലിലേയ്ക്കിറങ്ങി....
_____________________________________

*ഒരു ജപ്പാനീസ് ഐതിഹ്യ ദേവന്‍.പിന്നാമ്പുറത്ത് തൂക്കിയിട്ട സഞ്ചിയില്‍ നിന്നും സൌഭാഗ്യം വാരിവിതറിക്കൊണ്ടും രോഗം ഇല്ലാതാക്കിയും ഊരുചുറ്റുന്നു..

അവലംബം
1. മസനോബു ഫുക്കുവോക്ക, ഒറ്റ വൈക്കോല്‍ വിപ്ലവം.
(വിവര്‍ത്തനം സി പീ ഗംഗാധരന്‍) ആള്‍ട്ടര്‍ മീഡിയാ, തൃശൂര്‍
2. വിക്കിപീഡിയ
3. പ്ലൌ ബോയിയും ഫുക്കുവോക്കയുമായുള്ള അഭിമുഖം.
4. Organic farming website

ഒറ്റവൈക്കോല്‍ വിപ്ലവം -1

2007-05-29T01:20:00.000+05:30

അതേ പിള്ളേരേ ഞാനിന്നെന്തോ പറയും?

എന്തോന്ന് പറയുംന്നും കൂടിയറിയാതെയാണൊ വന്നത്..നല്ല കാര്യം..

വലിയ വലിയ വര്‍ത്തമാനമൊന്നും പറയാനറിയില്ല..വിവരവുമില്ല..നിങ്ങള്‍ പറയൂ..എന്ത് പറയണം?

അമ്പിയണ്ണന്‍‍ പുസ്തകമൊന്നും വായിയ്ക്കാറില്ലേ?

ഒണ്ട് ..അല്ലറ ചില്ലറ വായന..അത്രേള്ളൂ..ഇപ്പം ബ്ലോഗ്വായന മാത്രം..:)

എന്നാ വായിച്ച ഒരു പുസ്തകത്തിനെപ്പറ്റി പറഞ്ഞാട്ടേ..

ഞാനെന്തിനാ പറയുന്നേ? നിങ്ങളങ്ങ് വായിച്ചാപ്പോരേ..
അതുവേണ്ടാ ...ഓരോരുത്തരുടേയും വായന വേറേവേറേ ആയിരിയ്ക്കുമെന്ന് പരാജിതനണ്ണന്റെ ഒരു കവിതക്കമന്റിലുണ്ട്..

എവരീ കവിതക്കമന്റും വായിയ്ക്കുമോ..എന്നാലും പോട്ട് ഞാന്‍ വായിച്ച പുസ്തകത്തിനെപ്പറ്റി പറയണം ല്ലേ..എന്ത് പുസ്തകത്തിനെപ്പറ്റിയാണ് പറയുയേണ്ടത്?

ഏതെങ്കിലും.....പിന്നേ ഒരു കാര്യം പറഞ്ഞേക്കാം..പിള്ളെരാണെന്ന് വിചാരിച്ച് പിന്റുമുയലും കള്ളക്കുറുക്കനും എന്ന മട്ടിലുള്ള കഥാപുസ്തകമൊന്നും പറയണ്ടാ..അതൊക്കെ ഞങ്ങള് വായിച്ചോളാം..

അപ്പൊ സീരിയസ് പുസ്തകം വേണോ?
ങും..സീരിയസ്..ഞങ്ങക്കെല്ലാം മനസ്സിലാകും..മനസ്സിലാകാത്തത് വളരുമ്പം പൊറുത്തോളും..:)

എന്നാല്‍ ഞാനിന്ന് മസനോബു ഫുക്കുവോക്കയെപ്പറ്റി പറയാം..

ജപ്പാന്‍ കാരനാണോ?

തന്നെ..നെനക്കെങ്ങനെ മനസ്സിലായി?

പെരുകേട്ടാലറിയില്ലേ?നമ്മുടേ വക്കാരി മാമന്റെ ആരെങ്കിലുമാണോ?

വക്കാരിമാമന്‍ മലയാളിയാ.(ആണോ?:)...ഇത് ജപ്പാനിലുള്ള ഒരു കര്‍ഷകനാകുന്നു..മസനോബു ഫുക്കുവോക്കാ
അദ്ദേഹം ഒരു പുസ്തകമെഴുതിയിട്ടുണ്ട്..ഒറ്റ വൈക്കോല്‍ വിപ്ലവം..

വിപ്ലവം വരുത്തുന്ന ബുക്കാണോ.?.ബോളീവിയന്‍ ഡയറി പോലെ..?

അയ്യടാ..നീ ബൊളീവിയന്‍ ഡയറിയെന്നൊക്കെ കെട്ടിരിയ്ക്കുന്നോ..?

കേള്‍ക്കുക മാത്രമല്ല തൊക്കെ വായിച്ചിട്ടുമുണ്ട്.... ഇതും അതുപോലൊക്കെയുള്ളതാണോ?

ഇതും വിപ്ലവം തന്നെ..പക്ഷേ ഒന്നും ചെയ്തോണ്ടുള്ള വിപ്ലവമല്ല..ഒന്നും ചെയ്യാതെയുള്ള വിപ്ലവം..

ഒന്നും ചെയ്യാതെങ്ങനാ വിപ്ലവം വരുന്നത്?

വിപ്ലവം എവിടുന്നു വരുന്നു..?

ഹൊ ഒരു വാക്കു കിട്ടിയാ അതേക്കേറി പിടിച്ചോണം..എങ്കില്‍ ഒന്നും ചെയ്യാതെങ്ങനാ വിപ്ലവം ഉണ്ടാകുന്നത്?

വിപ്ലവം എന്നാല്‍ പൊടുന്നനെയുള്ള മാറ്റം എന്നാണെന്നു തോന്നുന്നു അര്‍ത്ഥം.മലയാളം അര്‍ത്ഥം അറിഞ്ഞിട്ട് കാര്യമില്ലല്ലോ..റെവലൂഷന്‍ എന്ന വാക്കിന്റെ അര്‍ത്ഥമെന്താണ്?

ഓഫ് ടോപ്പിയ്ക്കടിയ്ക്കരുത്..കാര്യം പറയൂ ഒന്നും ചെയ്യാതെയെങ്ങനാ വിപ്ലവമുണ്ടാകുന്നത്?

അതിന് അദ്ദേഹത്തിന്റെ ജീവിതത്തെപ്പറ്റി അറിയണം..മനുഷ്യന്‍ പരിതസ്ഥിതികളുടെ സൃഷ്ടിയാണെന്നല്ലേ പറയപ്പെടുന്നത്..അതായത് ജീവചരിത്രമറിയണം..

ഇതാ നിങ്ങളീ അണ്ണന്‍ /മാമന്‍ കൊമ്പ്ലക്സുകാരുടെ ഒരു കുഴപ്പം..എന്തു പറഞ്ഞാലും ചരിത്രം..ഭൂതകാലം കാന്‍സല്‍ ചെയ്ത ചെക്കാണെന്ന് ആരോ പറഞ്ഞിരിയ്ക്കുന്നു..കേട്ടിട്ടില്ലേ

എന്നാലും ഒരല്‍പ്പം ചരിത്രം..ച്ചിരി..അല്ലേ ഈ പോസ്റ്റ് വായിയ്ക്കുന്ന നാട്ടാരെന്ത് പറയും..ഞാന്‍ ചുമ്മാ ചാറ്റുവാരുന്നെന്ന് പറയൂലേ.മാത്രമല്ല ചരിത്രത്തെപ്പറ്റിയുള്ള നല്ല ബോധം ഭാവിയെ നന്നായി അഭിമുഖീകരിക്കാനും നമ്മളെ സഹായിയ്ക്കും..ഞാനിത്തിരി കോമ്പളക്സടിച്ചോട്ടെടാ..

അണ്ണാ ഞാനൊരു കാര്യം പറഞ്ഞോട്ടേ..ഈ ഭൂതം ഭാവിയെന്നൊക്കെപ്പറയുന്നതില്‍ വലിയ കാര്യമൊന്നുമില്ല..ആര്‍ക്കറിയാം നാളെയെന്ത് നടക്കുമെന്ന് ?.

വര്‍ത്തമാനത്തില്‍ സന്തുഷ്ടരാകൂ എന്നാണ് മഹാന്മാര്‍ പറഞ്ഞിരിയ്ക്കുന്നത്..അതുകൊണ്ട് അണ്ണന്‍ വര്‍ത്തമാനം പറയൂ..

ടാ..വര്‍ത്തമാനം എന്നത് പ്രെസെന്റ് എന്ന അര്‍ത്ഥത്തിലാ...അല്ലാതെ വര്‍ത്താനമല്ല
പ്രസന്റ് സാര്‍..പറയൂ..ചരിത്രമോ ഭൂമിശാസ്ത്രമോ എന്താന്നുവച്ചാല്‍ പറയൂ..ഞങ്ങള്‍ റെഡി..

ഈ പുസ്തകമെഴുതിയ ഫുക്കുവോക്ക, മസനോബു ഫുക്കുവോക്ക ജപ്പാന്‍ ദ്വീപ് സമൂഹത്തിലെ തെക്കുഭാഗത്തായിട്ടൂള്ള ഷികോകു എന്ന ദ്വീപിലെ,ഒരു ചെറിയ ഗ്രാമത്തില്‍,1914ലാണ് ജനിച്ചത്.ഒരു സാധാരണ കര്‍ഷകകുടുംബത്തില്‍..

അന്ന് ഇതുപോലൊന്നുമല്ല....ഇങ്ങനെ ചാറ്റു ചെയ്യാനൊന്നും പറ്റില്ല..അന്ന് കുട്ടികള്‍ സ്കൂളില്‍ നിന്നു വന്നാല്‍ പാടത്ത് അച്ഛനമ്മമാരെ പണിയ്ക്ക് സഹായിയ്ക്കുമാരുന്നു..

ഞാനും അച്ഛനെ പണിയില്‍ സഹായിയ്ക്കാറുണ്ട്..കഴിഞ്ഞ റിലീസിന് അച്ഛനെഴുതിയ കോഡെല്ലാം ഡിബഗ് ചെയ്തത് ഞാനും ഏട്ടനും കൂടിയാ..

എടാ ഭയങ്കരാ..:) അച്ഛന്‍ നിനക്ക് എന്നിട്ട് കാശുതന്നോ..അങ്ങേര് ശമ്പളം തരണ്ടേ..

ഒന്നും തന്നില്ല..ചില ഹോളീഡേ വാഗ്ദാനങ്ങള്‍ പുഴുങ്ങാന്‍ വച്ചിരിയ്ക്കുന്നു..വേവട്ടേ എന്ന് ഞാനും വിചാരിച്ചു..

അങ്ങനാന്നേ ഞാനും സഹായിച്ചിട്ടുണ്ട്..ഞാനും അച്ഛന്റെ കൂടെ കക്കാവാരാന്‍ പോകും..

ഞാന്‍ അച്ഛന്റെ കണക്കുകള്‍ നോക്കിക്കൊടുക്കും..

മതി..മതി..എല്ലാരും അച്ഛനെ സഹായിയ്ക്കും..കക്കാവാരലുകാരാ..വെള്ളത്തില്‍ ആഴത്തിലേയ്ക്കൊന്നും മുങ്ങാനിപ്പൊ പോകണ്ടാ..കേട്ടോ..ചെവിയ്ക്ക് കേടാണ്..ആഴം കുറഞ്ഞ ഭാഗത്ത് മുങ്ങിയാ മതി..

മുങ്ങാന്‍ അപ്പന്‍ സമ്മതിയ്ക്കൂല..ഞാന്‍ വള്ളത്തേലങ്ങനെയിരിയ്ക്കും..:)ഉച്ചകഴിഞ്ഞാ അപ്പനും ഞാനും വായനശാലേ വന്നിരിയ്ക്കും..അവിടുന്നാ ബ്ലോഗ്ഗുന്നേ..

അത് കൊള്ളാം....അതൊക്കെ പോട്ട് നമുക്ക് ജീവചരിത്രം തുടരാം....
അദ്ദേഹം സര്‍വകലാശാലയില്‍..മൈക്രോബയോളജിയും സസ്യ രോഗങ്ങളെപ്പറ്റിയുമാണ് പഠിച്ചത്..എന്നിട്ട് യോകോഹാമയിലുള്ള കാര്‍ഷിക കസ്റ്റംസ് ആപ്പീസില്‍ ജോലിയ്ക്ക് കയറി..

ഈ കസ്റ്റംസ് ആപ്പീസിന് മലയാളമൊന്നുമില്ലേ?

കുഴഞ്ഞു..
പോയി ഉമേശപ്പൂപ്പനൊട് ചോദിയ്ക്ക്..എനിയ്ക്കറിയത്തില്ല..
അല്ല നില്ല് നില്‍ക്കൂ..പുസ്തകത്തിന്റെ മലയാളം വിവര്‍ത്തനത്തില്‍ കിടക്കുന്നു..ചൌക്കക്കച്ചേരി..

ങാ..അപ്പൊ അദ്ദേഹം ചൌക്കക്കച്ചേരിയുടെ കയറ്റിറക്കു വിഭാഗത്തില്‍ പരിശോധകനായി ജോലിനോക്കുകയായിരുന്നു.കയറ്റിറക്കു ചെയ്യുന്ന സസ്യഭാഗങ്ങളിലോ ഭക്ഷണവസ്തുക്കളിലോ രോഗവാഹികളായ കീടങ്ങളണ്ടോ എന്നു പരിശോധിയ്ക്കലായിരുന്നു പ്രധാന ജോലി...കൂടെ സസ്യ രോഗങ്ങളുണ്ടാക്കുന്ന കുമിളുകളെപ്പറ്റി ഗവേഷണം നടത്തുകയും ചെയ്തു.

കഠിനാധ്വാനിയയിരുന്നു ഫുക്കുവോക്കാ...ശരീരം നോക്കാതെ ഗവേഷണത്തില്‍ മുഴുകി പരീക്ഷണ ശാലയില്‍ കുഴഞ്ഞു വീണ അവസരങ്ങള്‍ പോലുമുണ്ടായിട്ടുണ്ട്..
എന്നാലും ഉന്മാദകരമായ യൌവനത്തിന്റെ നാളുകളായിരുന്നു അവയെന്നാണ് ഫുക്കുവോക്ക എഴുതുന്നത്..

ചിലപ്പോഴൊക്കെ ചുറ്റിയടിയ്ക്കും ചിലപ്പോ നൃത്തശാലയില്‍ ചെന്ന് നൃത്തം ചെയ്യും..അങ്ങനെ പോകുന്ന ദിവസങ്ങള്‍...

അങ്ങനെയിരിയ്ക്കെയാണ് ഫുക്കുവോക്കയ്ക്ക് ഒരു അനുഭവമുണ്ടായത്..
എന്തനുഭവം..?

അത്..എന്തനുഭവമെന്ന് എനിയ്ക്ക് പറയാനറിയില്ല..ഓരോരുത്തരുക്കും അനുഭവങ്ങള്‍ ഓരോന്നല്ലേ..ഞാന്‍ ഫുക്കുവോക്ക പറയുന്നത് അതുപോലെ എഴുതിയിടാം..നിങ്ങള്‍ തന്നെ തീരുമാനിച്ചോ എന്തനുഭവമെന്ന്..

"സംഗതിയെന്തായാലും ധാരാളം പണിയെടുക്കുന്ന ഭാഗ്യവാനായ ഒരു ചെറുപ്പക്കാരനായിരുന്നു ഞാന്‍. സൂക്ഷ്മ ദര്‍ശിനിയുടെ കുഴല്‍ക്കണ്ണിലൂടെ അനാവരണം ചെയ്യപ്പെട്ട വിശ്വപ്രകൃതിയുടെ വിലാസങ്ങളില്‍ വിസ്മയിച്ചു ഞാന്‍ ദിവസങ്ങള്‍ പിന്നിട്ടു.കണ്ണാടിക്കുഴലിലൂടെ കണ്ട അതിസൂക്ഷ്മ ലോകത്തിനും അനാദ്യന്ത പ്രപഞ്ചത്തിനും തമ്മിലുള്ള അപാര സാദൃശ്യമാണെന്നെ അത്ഭുതപ്പെടുത്തിയത്.

സായാഹ്നങ്ങളില്‍ പ്രേമത്തില്പെട്ടിട്ടോ അല്ലാതേയോ വിഹാരലോലനായി ചുറ്റിക്കറങ്ങി ഞാന്‍ സ്വയം രമിപ്പിച്ചു. ലക്കറ്റ ജീവിതവും അമിതാധ്വാനവും എന്നെ തളര്‍ത്തി.അതിനാല്‍ ഞാന്‍ പരീക്ഷണശാലയില്‍ പലവട്ടം കുഴഞ്ഞുവീണു.ഓടുവില്‍ എനിയ്ക്ക് കഠിനമായ ന്യുമോണിയ പിടിപെട്ടു..

പോലീസാശുപത്രിയുടെ മുകള്‍ത്തട്ടിലെ മുറികളിലൊന്നില്‍ ഞാന്‍ കിടപ്പിലുമായി.,മഞ്ഞുകാലം..കിളിവാതിലിന്റെ തകര്‍ന്ന കണ്ണാടിപ്പഴുതിലൂടെ കാറ്റ് ഹിമശകലങ്ങളെ അകത്തേയ്ക്ക് തൂത്തെറിഞ്ഞു.മൂടിപ്പുതച്ച ഉടലില്‍ ചൂടുണ്ട് ..എന്നാല്‍ മുഖം ഐസുപോലെ തണുത്തിരിയ്ക്കുന്നു.നേഴ്സ് വന്ന് പനിച്ചൂട് നോക്കും. തെല്ലിട നില്‍ക്കാതെ അവള്‍ പോകുകയും ചെയ്യും.

കൊടും തണുപ്പിലെന്നെ തള്ളിയിട്ടിരിയ്ക്കുന്നു.തുണയെല്ലാമറ്റ ഏകാന്തതയുടെ ശൂന്യതയില്‍ മുങ്ങിത്താഴുകയാണ് ഞാനെന്നു തോന്നി. മുഖത്തിനു മുന്നില്‍ തന്നെ മരണം വന്നെത്തിനോക്കുന്നതായി ഞാന്‍ പേടിച്ചു. കാര്യം നിസാരമെന്ന് ഇന്നെനിയ്ക്കു തോന്നുന്നുണ്ട്..പക്ഷേ ഗുരുതരമായിരുന്നു അന്നത്തെ നില.“

ഇത് പലപ്പോഴും എനിയ്ക്ക് തോന്നിയിട്ടുള്ളതാണ്..ഇന്ന് വളരെ ഗുരുതരമെന്ന് തോന്നുന്നത് നാളെ നിസാരമായിത്തോന്നും..
അത് ശരിയാ അച്ഛന്റെ ആപ്പീസുമുറിയില്‍ The crisis of today is the joke of tomorrow എന്നെഴുതി വച്ചിട്ടുണ്ട്

അപ്പൊ നാളത്തെ താമാശകള്‍ക്ക് വേണ്ടീ നാമെന്തിനാ ഇത്ര ടെന്‍ഷനടിയ്ക്കുന്നേ അല്ലേ..പക്ഷേ സമയമാകുമ്പോള്‍ ഇതൊക്കെ നാം മറക്കും..എന്റെ കുഴപ്പമതാണ്..ആപ്പീസുമുറിയിലെഴുതിവയ്ക്കുന്നത് നല്ലതുതന്നെ..പ്രശ്നങ്ങളുണ്ടാകുമ്പോ ഓര്‍ക്കുമല്ലോ..

ഞാനത് ഇനി ബുക്കിലെഴുതി വയ്ക്കും..എനിയ്ക്ക് സ്കൂളിലാ ഏറ്റവും പ്രശ്നം..ചിലപ്പോ തല്ലുകിട്ടുമ്പോഴോ മാര്‍ക്ക് കിട്ടുമ്പോഴോ ഒക്കെ അങ്ങ് മരിച്ചാ മതീന്ന് തോന്നും..പിന്നെയാലോചിയ്ക്കുമ്പോ എല്ലാം രസം..

തല്ലോ, ആരാ തല്ലുന്നേ?

സാറന്മാരുതന്നെ..എന്തിനും ഏതിനും തല്ലു തന്നെ..

ഇവിടെ ആരും കുട്ടികളെ തല്ലാന്‍ പാടില്ലെന്നാ നിയമം.

നമ്മുടെ നാട്ടിലുംആ നിയമങ്ങളൊക്കെ കൊണ്ടു വരാം.. ഇപ്പൊ നമുക്ക് വാചകമടി നിര്‍ത്തി വായന തുടരാം..

“ഒടുവില്‍ ആസ്പത്രി വിട്ടെങ്കിലും പിടികൂടിയ വിഷാദത്തില്‍ നിന്നും രക്ഷപെടാന്‍ എനിയ്ക്കായില്ല.
അക്കാലം വരെ എന്നില്‍ ഉറപ്പുനേടിയിരുന്ന വിശ്വാസങ്ങള്‍ക്ക് ആധാരമെന്ത്? എനിയ്ക്കൊന്നിലും കൂസലുണ്ടായിരുന്നില്ല.ഞാന്‍ സംതൃപ്തനായിരുന്നു. ആ സംതൃപ്തിയുടെ പ്രകൃതമെന്ത്? ജനന മരണ രഹസ്യം എനിയ്ക്കുള്ളില്‍ തറഞ്ഞ ശല്യമായി.
ഉറക്കമില്ല...ഒരു പണിയും വയ്യ. തുറമുഖ പരിസരത്തും കീഴ്ക്കാം തൂക്കായ കടലോരത്തുമുള്ള രാത്രി സഞ്ചാരങ്ങള്‍ എനിയ്ക്കാശ്വാസം തന്നില്ല.

അങ്ങനെ തുറമുഖത്തിനു പിന്‍പുറത്തുള്ള കുന്നിലൂടെ അലയുന്നൊരു രാത്രി നേരം ക്ഷീണം മുഴുത്ത ഞാന്‍ കുഴഞ്ഞു വീണു.വലിയൊരു മരം ചാരി ഉദയം വന്നെത്തി നോക്കും വരെ , ഉറങ്ങാതെ എന്നാലുണരാതെ ഞാനാ കിടപ്പു കിടന്നു.മേയ് മാസത്തിലെ പതിനഞ്ചാം പുലരിയായിരുന്നു അന്ന്..എന്റെ മയക്കക്കാഴ്ചയില്‍ തെളിഞ്ഞ ഉദയവും വെട്ടത്തില്‍ ഉണര്‍ന്ന തുറമുഖവും എങ്ങിനേയോ മങ്ങിമാഞ്ഞു.അപ്പോള്‍ നനുത്തൊരു തീരക്കാറ്റില്‍ ഉഷസ്സിന്റെ നെരിയ മഞ്ഞുറ്റുപ്പ് അഴിഞ്ഞുപോയി.

അതാ ഒരു രാക്കൊക്ക് ..ചെവിതുളയ്ക്കുന്ന ഒരൊച്ചയുമിട്ട് അത് പറന്നകന്നു..അകലുന്ന ചിറകടി ശബ്ദം എനിയ്ക്കു വ്യക്തമായി കേള്‍ക്കാം.ആ ക്ഷണം എന്റെ സന്ദേഹങ്ങള്‍ ഒഴിഞ്ഞു. പ്രജ്ഞയെ കലുഷമാക്കിയ വിഷാദത്തിന്റെ പുകപടലവും മാഞ്ഞു.ആ കാറ്റിനൊപ്പം ഉറച്ച വിശ്വാസത്തില്‍ ഞാനുറപ്പിച്ചിരുന്നതെല്ലാം , എനിയ്ക്കു താങ്ങായ് നിന്നിരുന്നതെന്തും പോയ്മറഞ്ഞു.എന്നില്‍ ശേഷിച്ചത് ഇതൊന്നു മാത്രം.
"ഇല്ല ഈ ലോകത്തില്‍ ഒന്നുമില്ല.”

ഇവ വിചാരിയ്ക്കാതെ വന്ന ഉള്ളില്‍ നിന്നു തന്നെയുയര്‍ന്ന വാക്കുകള്‍..ഒന്നും ഞാനറിയുന്നില്ലെന്ന് ഞാനറിഞ്ഞു.
എനിയ്ക്കാധാരമായിരുന്ന ധാരണകള്‍ അസ്തിത്വ സങ്കല്‍പ്പം തന്നെയും കേവലം ഇല്ലാത്തതെന്ന് ഞാന്‍ കണ്ടു..എന്റെ ചേതന മേദസ്സറ്റു തെളിമയുറ്റതായി..ആനന്ദ ലഹരിയില്‍ ഞാന്‍ നൃത്തം ചെയ്തു..മരച്ചില്ലകളില്‍ കിളികള്‍ ചിലയ്ക്കുന്നതെനിയ്ക്കു കേള്‍ക്കാം ..അകലെ കടലലകളില്‍ അരുണകിരണങ്ങളുടെ മിന്നിത്തിളക്കം...അരികെ തുള്ളിക്കളിയ്ക്കുന്ന ഇലകളില്‍ പച്ചത്തിളക്കം.ഇതാ‍ണ് സ്വര്‍ഗ്ഗം..എന്റെ അല്ലലെല്ലാം പാഴ്ക്കിനാവെന്ന മട്ടില്‍ പോയിമറഞ്ഞു..ആ സ്ഥാനത്ത് “ശരിയായ പ്രകൃതി “ എന്ന എന്തോ ഒന്ന് മറനീക്കി പുറത്തുവന്നു.”

(ഒറ്റവൈക്കോല്‍ വിപ്ലവം : മസനോബു ഫുക്കുവോക്കാ..)

ഇനിത്രയും മതി..ബാക്കി നാളെയാവാം..പോരേ?

നല്ല രസമുണ്ടായിരുന്നു..ശരി..ഇത് ഒന്നൂടെ വായിയ്ക്കട്ടേ..

ശരി..വീട്ടില്‍ പോകാറായി..ഇരുട്ടുന്നു..വായനശാല അടയ്ക്കാന്‍ ദാണ്ടേ ബിനുവേട്ടന്‍ വരുന്നു..പോകട്ടേ

ഇവിടെ എനിയ്ക്ക് സ്കൂളില്‍ പോകാനുള്ള നേരമായി..അച്ഛന്‍ റെഡിയായെന്നു തോന്നുന്നുണ്ട്..ഞാനും പോകുന്നു:)

എനിയ്ക്ക് ലഞ്ച് ബ്രേക്ക് കഴിഞ്ഞു..ഞാനും പണിയ്ക്ക് പോകട്ടേ..അപ്പൊ ബൈ..നാളെ..:)

കളിപ്പാട്ടുകള്‍

2007-05-23T18:42:00.000+05:30

ഒന്ന്
ധന്യമോളേ,
എന്തു വേണം?
വള വേണം.
എന്തു വള?
കുപ്പിവള.
എന്തു കുപ്പി?
സോഡക്കുപ്പി
എന്തു സോഡ?
അപ്പ സോഡ.
എന്തപ്പം?
നെയ്യപ്പം.
എന്തു നെയ്യ്?
കാട്ടു നെയ്യ്.
എന്തു കാട്?
കുറ്റിക്കാട്.
എന്തു കുറ്റി ?
ചെപ്പക്കുറ്റി

രണ്ട്

നീലമ്മ മരിച്ചു.
എനിക്കൊന്നു കാണേണം.
എന്തുടുത്തു പോകേണം?
പട്ടുടുത്തു പോകേണം.
എന്തില്‍ കേറി പോകേണം?
ബസ്സില്‍ കേറി പോകേണം.
ബസ്സോടിക്കാനാരാണ്?
അടുത്ത വീട്ടിലെ ബാബു .
ബാബൂനെന്താ കൊടുക്ക്വാ?
ഒരു ഗ്ലാസ് ചായ.

മൂന്ന്

അമ്പലത്തില്‍ ദേവി
ദേവിടെ കയ്യില്‍ കുട്ടി
കുട്ടിടെ കയ്യില്‍ തോക്ക്
തോക്കിന്റുള്ളില്‍ നെല്ല്
നെല്ല് തിന്നാന്‍ കോഴി
കോഴിയെ പിടിക്കാന്‍ കുറുക്കന്‍
കുറുക്കനെ പിടിക്കാന്‍ കള്ളന്‍
കള്ളനെ പിടിക്കാന്‍ പോലീസ്
പോലീസിനെ പിടിക്കാന്‍ പട്ടാളം
പട്ടാളത്തിനെ പിടിക്കാന്‍ ദൈവം
ദൈവത്തിനെ പിടിക്കാന്‍ ആരൂല്ല.

നാല്

സേ..സേ...സേ...
ബിസ്കറ്റ്...ബിസ്കറ്റ്
എന്തു ബിസ്കറ്റ്
പാല്‍ ബിസ്കറ്റ്
എന്തു പാല്‍
എരുമപ്പാല്‍
എന്തെരുമ
കുത്തുന്ന എരുമ
(ഇത് ഒരു തപ്പു കൊട്ടിക്കളി പാട്ടാണ്(എല്ലാ പാട്ടുകളും).പാട്ടിന്റെ അവസാനം കുത്തുന്ന എരുമ എന്ന് പറയുന്ന ആള്‍ എതിരാളിയുടെ വയറ്റിന് കുത്തുന്നു)

ഡാലിക്ക് സമര്‍പ്പണം.

തൂലികാനാമങ്ങള്‍

2007-05-22T20:46:00.000+05:30

സാഹിത്യകാരന്‍--തൂലികാനാമം

അക്കിത്തം--അക്കിത്തം അച്യുതന്‍ നമ്പൂതിരി
ആനന്ദ്--പി.സച്ചിദാനന്ദന്‍
ആഷാ മേനോന്‍--കെ ശ്രീകുമാര്‍
ഇടശ്ശേരി--ഗോവിന്ദന്‍ നായര്‍
ഉള്ളൂര്‍--എസ്.പരമേശ്വരയ്യര്‍
ഉറൂബ്--പി.സി കുട്ടികൃഷ്ണന്‍
എന്‍.എന്‍ കക്കാട്--കെ നാരായണന്‍ നമ്പൂതിരി
കടമ്മനിട്ട--രാമകൃഷ്ണന്‍
കാക്കനാടന്‍--ജോര്‍ജ്ജ് വര്‍ഗീസ്
കാരൂര്‍ --നീലകണ്ഠപ്പിള്ള
കെ.എ കേരളീയന്‍--കടപ്രത്തു കുഞ്ഞപ്പ നമ്പ്യാര്‍
കേസരി--എ.ബാലകൃഷ്ണപ്പിള്ള
കോവിലന്‍--വി.വി അയ്യപ്പന്‍
ചെറുകാട്--സി ഗോവിന്ദ പിഷാരടി
ജി--ജി ശങ്കരക്കുറുപ്പ്
തിക്കോടിയന്‍--പി.കെ കുഞ്ഞനന്തന്‍ നായര്‍
നന്തനാര്‍--പിശി--ഗോപാലന്‍
പാലാ--നാരായണന്‍ നായര്‍
പി--കുഞ്ഞിരാമന്‍ നായര്‍
വള്ളത്തോള്‍--നാരായണമേനോന്‍
വി.കെ.എന്‍--വി.കെ നാരായണന്‍ നായര്‍
വിലാസിനി--എം.കെ മേനോന്‍
വെണ്ണികുളം--ഗോപാലകുറുപ്പ്
വൈലോപ്പിള്ളി--ശ്രീധരമേനോന്‍
സഞ്ജയന്‍--എം.ആര്‍ നായര്‍
സുമംഗല--ലീലാനമ്പൂതിരിപ്പാട്
സേതു--എ സേതുമാധവന്‍

കടങ്കഥകള്‍(ഉത്തരങ്ങള്‍)

2006-12-01T17:41:00.001+05:30

1.വെറ്റില മുറുക്കുക
2.മൂക്ക്
3.പപ്പടം
4.വാഴയും കുലയും
5.ക്യാമറ
6.കവുങ്ങ്
7.അടയ്ക്ക
8.കുമ്പളങ്ങ
9.കുട
10.ഘടികാര സൂചികള്‍
11.വെള്ളരിക്ക(അപ്പു ഉണ്ടാക്കിയ കടങ്കഥയാണത്രേ ഇത്.)
12.കയ്പ്പയ്ക്ക
13.തേങ്ങ.
14.വാളന്‍ പുളി
15.ചക്ക
16.താക്കോല്‍
17.മഞ്ഞള്‍
18.വിളക്ക്
19.പുളിമരം
20.കട്ടില്‍
21.കിണ്ടി
22.കോഴിമുട്ട,കണ്ണ്
23.കുന്നിക്കുരു
24.തേങ്ങ
25.ആകാശത്ത് നക്ഷത്രങ്ങള്‍
26.മത്തങ്ങ.
27.പഴം
28.കിണര്‍
29.കണ്‍പീലികള്‍
30.തീപ്പെട്ടിയില്‍ ഉരച്ച് തീപ്പെട്ടിക്കൊള്ളി കത്തിക്കുക
(ചോദ്യങ്ങള്‍ ഇവിടെ)

കടങ്കഥകള്‍

2006-11-29T08:44:00.000+05:30

1.അകത്തേക്കു പോവുമ്പോള്‍ പച്ച ,പുറത്തേക്കു വരുമ്പോള്‍ ചുവപ്പ് .
2.അകത്തു രോമം പുറത്തിറച്ചി.
3.ഞെട്ടില്ലാ വട്ടയില.
4.അമ്മ കല്ലിലും മുള്ളിലും മകള്‍ കല്യാണ പന്തലില്‍ .
5.ഒരു കണ്ണുകൊണ്ട് നോക്കിക്കാണും കണ്ടതൊക്കെ ഉള്ളിലാക്കും .
6.ഒരമ്മയ്ക്ക് തോളോളം വള.
7.ഒരമ്മ പെറ്റ മക്കളൊക്കെ തൊപ്പിക്കാര് .
8.ചാരം പൂശിയവന്‍ ചന്തയ്ക്കു പോയി.
9.ഒറ്റക്കാലന്‍ ചന്തയ്ക്കു പോയി .
10.വലിയകാല് വേഗം വേഗം ചെറിയകാല് മെല്ലെ മെല്ലെ .
11.പുള്ളി പൂശിയവന്‍ ചന്തയ്ക്കുപോയി.
12.മുതുകത്തുമുള്ളനും ചന്തയ്ക്കു പോയി .
13.മുക്കണ്ണന്‍ ചന്തയ്ക്കൂപോയി .
14.വാളാവളഞ്ചനും ചന്തയ്ക്കു പോയി .
15.മുള്ളുണ്ട് മുരിക്കല്ല, പാലുണ്ട് പശുവല്ല.
16.കിക്കിലുക്കും കിലുകിലുക്കും ഉത്തരത്തില്‍ ചത്തിരിക്കും .
17.മണ്ണിന്നടിയില്‍ പൊന്നമ്മ .
18.കൊക്കിരിക്കെ കുളം വറ്റിവറ്റി .
19.ആനയെകെട്ടാന്‍ മരമുണ്ട് ജീരകം പൊതിയാന്‍ ഇലയില്ല.
20.ഒരാളെ ഏറ്റാന്‍ നാലാള് .
21.എല്ലാകാളയ്ക്കും മണ്ടയ്ക്ക് കൊമ്പ്,വെള്ളക്കാളയ്ക്ക് പള്ളയ്ക്ക് കൊമ്പ് .
22.ഒരു പാത്രത്തില്‍ രണ്ടെണ്ണ .
23.കാക്കറുപ്പും മുക്കാല്‍ ചുവപ്പും .
24.കാടു വെട്ടി പാറകണ്ടു,പാറ വെട്ടി വെള്ളി കണ്ടു,വെള്ളി വെട്ടി വെള്ളം കണ്ടു.
25.ആന കേറാമല ആളുകേറാമല ആയിരം കാന്താരി പൂത്തിറങ്ങി.
26.കാള കിടക്കും കയറോടും.
27.കുപ്പായമൂരി കിണറ്റില്‍ ചാടി
28.മുറ്റത്തെചെപ്പിനടപ്പില്ല .
29.അക്കരെ നില്‍ക്കും തുഞ്ചാണി ഇക്കരെ നില്‍ക്കും തുഞ്ചാണി കൂട്ടിമുട്ടും തുഞ്ചാണി .
30.അമ്മയെ കുത്തി മകന്‍ ചത്തു.
(ഉത്തരങ്ങള്‍ ഇവിടെ)

ശാസ്ത്ര പ്രശ്നോത്തരി

2006-10-29T15:18:00.000+05:30

ചോദ്യങ്ങള്‍

1.ഹിമോഗ്ലോബിനില്‍ അടങ്ങിയിരിക്കുന്ന ലോഹം ?
2.മൂത്രത്തിലൂടെ വിസര്‍ജ്ജിക്കപ്പെടുന്ന വിറ്റാമിന്‍ ?
3.ഓസോണ്‍ ദിനം എന്ന്?
4. സസ്യത്തിന്റെയും ജന്തുവിന്റെയും ഗുണങ്ങളുള്ള ജീവി ഏത്?
5. ചിക്കുന്‍ഗുനിയ പരത്തുന്ന കൊതുകുകള്‍ ?
6. നെല്ലിന്റെ ശാ‍സ്ത്രനാമം എന്ത്?
7.മണ്ണിരയുടെ ശ്വസനാവയവം ?
8.ദൂരം അളക്കുന്നതിനുള്ള ഏറ്റവും വലിയ യൂണിറ്റ് ?
9. സൂര്യന്‍ കിഴക്കുദിച്ച് പടിഞ്ഞാറോട്ട് സഞ്ചരിക്കുന്നതായി തോന്നുന്നു. കാരണമെന്ത്?
10. ദ്രാവകാവസ്ഥയിലുള്ള ഒരു ലോഹം ?
11.ഏതാണ് കണ്ണീര്‍ വാതകം?
12.അക്വാറീജിയ എന്നാലെന്ത്?
13. വെള്ളത്തിലിട്ടാല്‍ കത്തുന്ന ലോഹം?
14.ഡി. എന്‍ . എ.യുടെ പൂര്‍ണരൂപം ?
15. ആള്‍ട്ടിമീറ്റര്‍ എന്തിന് ഉപയോഗിക്കുന്നു?
16.വൈദ്യുതി കടത്തിവിടുന്ന ഒരു അലോഹം ?
17.ചൂടാക്കുമ്പോള്‍ ഖരാവസ്ഥയില്‍ നിന്ന് നേരിട്ട് വാതകാവസ്ഥയിലേക്ക് മാറുന്ന വസ്തു ?
18.ഡൈനാമോ കണ്ടുപിടിച്ചത് ആര്‍?
19. നാരങ്ങയില്‍ അടങ്ങിയ ആസിഡ് ഏത്?
20. ഏറ്റവും കൂടുതല്‍ ഓക്സിജന്‍ പുറത്തുവിടുന്ന മരം ഏത് ?
21. കുഞ്ഞുങ്ങളെ പ്രസവിക്കുന്ന പാമ്പ് ?
22. മനുഷ്യ ശരീരത്തിലെ ഏറ്റവും ഉറപ്പുള്ള അവയവം ?
23. ഓര്‍ണിത്തോളജി എന്തിനെക്കുറിച്ചുള്ള പഠനമാണ്?
24. ഉപ്പിന്റെ രാസനാമം ?
25. നില്‍ക്കാന്‍ ഒരിടവും ഒരു പാരക്കോലും തന്നാല്‍ ഞാന്‍ ഈ ഭൂമിയെപ്പോലും ഇളക്കാം എന്നു പറഞ്ഞ ശാസ്ത്രജ്ഞ്ന്‍ ?

ഉത്തരങ്ങള്‍

1.ഇരുമ്പ്.
2.വിറ്റമിന്‍ -സി.
3.സെപ്റ്റെംബര്‍ -16.
4. യുഗ്ലിന.
5. ഈഡിസ് ഈജിപ്തിയ.
6. ഒറൈസ സറ്റൈവ.
7.ത്വക്ക്.
8. പ്രകാശവര്‍ഷം.
9. ഭൂമി പടിഞ്ഞാറു നിന്ന് കിഴക്കോട്ട് സഞ്ചരിക്കുന്നത് കൊണ്ട്.
10. രസം.
11. ബെന്‍സീന്‍ ക്ലോറൈഡ്.
12.സ്വര്‍ണം ലയിപ്പിക്കാന്‍ കഴിയുന്ന ദ്രാവകം(ഹൈഡ്രോക്ലോറിക്കാസിഡ്+നൈട്രിക്കാസിഡ്)
13.സോഡിയം.
14.ഡി ഓക്സി റൈബൊന്യൂക്ലിക്കാസിഡ്.
15.ഉയരം അളക്കാന്‍ .
16.ഗ്രാഫൈറ്റ്.
17.കര്‍പ്പൂരം.
18.ഫാരഡെ.
19. സിട്രിക് ആസിഡ്.
20. ആല്‍മരം.
21. അണലി.
22. പല്ല്.
23. പക്ഷികളെക്കുറിച്ച്.
24. സോഡിയം ക്ലോറൈഡ്.
25. ആര്‍ക്കിമിഡീസ്.